Shynynda, tyń ıgerý – Qazaqstan tarıhyndaǵy jete zerttelmegen, kúngeıi men kóleńkesi qatar júretin asa ózekti tarıhnamalyq másele. Azapty jyldardyń aıqyn kórinisi. Qazaq jastaryn, ásirese órimdeı qyz balalardy aýyr jumysqa jekken saıası elıtanyń basbuzarlyǵy boldy. Kartınaǵa qarap otyryp, sol qasiretti kezeńniń boıaýy qanyq bolmaǵanyn kóremiz.
Búgingi áńgime belgili sýretshi Moldahmet Kenbaevtyń «Tirkemeshi» kartınasy jaıynda bolmaq. Tyń ıgerý kezeńi KSRO tarıhynyń ajyramas bóligine aınaldy. Tipti kórkemsýret oqý ornyn aıaqtaǵannan keıin óz erkimen tyńǵa kelip jatqan tanymal sýretshilerdiń shyǵarmashylyǵyna da arqaý boldy. Keńes ıdeologııasy beıneleý ónerine de taqyryptyq turǵydan tusaý saldy.
Qylqalam sheberi Moldahmet Kenbaev V.I.Sýrıkov atyndaǵy Máskeý kórkemsýret ınstıtýtynyń sońǵy kýrsynda oqyp júrgeninde Tyńǵa óziniń bir top kýrstasymen kelgen. О́ıtkeni jańa astyqqa jer ıgerý óziniń týǵan ólkesi Qazaqstan jerinde bastalyp jatqan edi. Tyńǵa jasaǵan sapary sýretshi úshin mańyzdy ról atqardy. Soltústik Qazaqstanda, Esil ózeniniń kórikti jaǵalaýynda alǵashqy tyń ıgerýshilerdiń ómiri men shopandardyń eńbegi týraly sýret salý ıdeıasy paıda bolady.
Sýretker «Tirkemeshi» kartınasynda traktor súırep bara jatqan soqanyń rólinde otyrǵan názik qyzdy beıneleıdi. Ushy-qıyry joq qazaq dalasynda ymyrt jamyla bastaǵan kez, aıdalǵan jerdiń atyzdary kókjıekke deıin sozylyp jatyr, jel qyzdyń burymdaryn, shópti terbetip tur.
Osy sátte avtor bar nazardy qyzǵa aýdartady. Ol – tús pen ólshemi tabylǵan kompozısııalyq orta. Qyzdyń tulǵasy kompozısııadaǵy eń iri element jáne onyń qaraqońyr túsi ashyq aspan men kúńgirt shóptiń fonynda aıqyn erekshelengen. Aıdalǵan jerdiń atyzdaryn keskilegen soqanyń tisteri yrǵaq týdyryp tur. Ol jeńil ári syzyqtyq kórinisterdi paıdalana otyryp, keńistikke tereńdik beredi. Sol arqyly dalanyń sheksizdigin sezdiredi.
Shyn máninde, sýretshi óz kartınalarynda qarapaıym eńbekkerlerdiń, alǵashqy tyń ıgerýshilerdiń, kolhozshylardyń eńbekterin kórsete bilgen. Soqanyń ne kombaınnyń rýlinde otyryp-aq, egistikten sary altynnyń masaqtaryn jınap, bolmasa mal sharýashylyǵymen aınalysyp-aq, shyǵarmashylyq qýanyshyn sezinýge bolatynyn aıqyndaıdy.