Qostanaıdaǵy Lev Tolstoı atyndaǵy oblystyq kitaphanada «Kitaphana túni» atty oqyrmandar merekesi ótti. Pandemııa kezindegi shekteýge baılanysty eki jyldaı úzilip qalǵan dástúrli shara bıyl tabıǵat baılyǵyn qorǵaý, qorshaǵan ortanyń tazalyǵyn saqtaý sııaqty ekologııalyq mańyzy bar máselelerge arnalyp otyr.
Kitaphananyń birinshi qabatynda balalar kıiminiń ekodefılesi, «Tabıǵat tartýy» sııaqty is-sharalar, al ekinshi, úshinshi qabattarda «Kapron qýyrshaqtar» buryshy men «Álem men tabıǵat úılesimi» ekovıktorınasy, «Organık market» kórmesi, «Fandraızıng EKO-bastamalar» panoramasy uıymdastyryldy. Is-sharaǵa arnaıy shaqyrylǵan ekolog mamandar jınalǵandarǵa «Tabıǵat tazalyǵy – tán tazalyǵy» taqyrybynda dáris oqyp, qyzyqty tapsyrmalar oryndatyp, zııatkerlik oıyndar ótkizdi.
Naýryzym qoryǵynyń qyzmetkerleri oqyrmandarǵa emdik qasıeti bar shópterden daıyndalǵan shaı usynyp, bul shópterdiń kómegimen qandaı aýrýlardy emdeýge bolatynyn aıtyp berdi. Al Qostanaıdaǵy «Ozat» mektebiniń oqýshylary kópshilikke hımııa páni boıynsha jasaǵan ekojobalaryn kórsetti.
Kesh qonaqtary túngi shamnyń syǵyraıǵan sáýlesimen kúńgirt tartyp, qupııa syrǵa bókken sırek kezdesetin kitaptar qoryna túsip, osynda saqtaýly turǵan kóne gazet tigindilerimen jáne qundy qujattarmen tanysty.
Uıymdastyrýshylar kishkentaı oqyrmandardy da nazardan tys qaldyrmaı, balalardyń kóńilin aýlaıtyn kóptegen qyzyqty tanymdyq oıyndar oılastyryp qoıypty. Balǵyndardyń bir toby tańǵajaıyp sıqyrshylardyń ónerin tamashalap qýanyshqa kenelip jatsa, ekinshileri qolóner sheberleriniń zalyna ótip, qyshtan ydys jasamaq bolyp áýrege túsip jatty.
Al oqyrmandar zalynda ótken «Jaýqazyn-ǵumyr» atty poezııa keshinde jergilikti aqyndar jastyq shaq, týǵan jer, mahabbat taqyryptaryna arnalǵan lırıkalyq óleńderin oqydy.