Elordada múlik ıeleri birlestiginiń (MIB) tóraǵasy káriz qudyǵynan esirtki taýyp aldy. Qala turǵyny birden polısııaǵa habar bergen. Bul týraly Nur-Sultan polısııa departamentiniń baspasóz qyzmeti málim etti, dep habarlaıdy Egemen.kz.
Nur-Sultan polısııa departamenti baspasóz qyzmetiniń aqparatynsha, esirtki oralǵan túıinshek E-15 kóshesindegi «Merkýrıı» turǵyn úı kesheniniń káriz qudyǵyna jasyrylǵan.
«MIB tóraǵasy úı aýmaǵyn aralaý barysynda aq tústi untaq salynǵan, lentamen oralǵan polıetılen túıinshek taýyp aldy. Er adam birden polısııaǵa habar berdi. Oqıǵa ornyna kelgen polıseıler belgisiz zatty tárkiledi», delingen habarlamada.
Bul fakti boıynsha sotqa deıingi tergeý bastaldy. Saraptama taǵaıyndaldy.
Polısııa tyıym salynǵan zattyń turǵyn úı kesheni aýmaǵyna qalaı túskenin anyqtap jatyr.
«Mercury Life» MIB tóraǵasy Rústem Aıtqojın qyraǵylyq tanytqany úshin gramotamen marapattaldy. Tártip saqshylary elorda turǵynyna belsendi azamattyq pozısııasy úshin alǵys aıtty.