Memleket basshysy Qasym-Jomart Toqaev Reformalar jónindegi joǵary keńestiń otyrysyn ótkizdi, dep habarlaıdy Egemen.kz Aqordanyń resmı saıtyna silteme jasap.
Qazaqstan Prezıdentiniń tóraǵalyǵymen Reformalar jónindegi joǵary keńestiń kezekti otyrysy ótti. Kún tártibinde 3 másele qaraldy. Jıyn Almaty aglomerasııasyn damytý máselesinen bastaldy. Ulttyq ekonomıka mınıstri Álibek Qýantyrov, Almaty qalasynyń ákimi Erbolat Dosaev, Almaty oblysynyń ákimi Qanat Bozymbaev baıandama jasady. Sondaı-aq Premer-Mınıstr Álıhan Smaıylov, Prezıdenttiń ekonomıkalyq damý máseleleri jónindegi shtattan tys keńesshisi, Reformalar jónindegi joǵary keńes tóraǵasynyń orynbasary Ser Sýma Chakrabartı jáne Astana halyqaralyq qarjy ortalyǵynyń basqarýshysy Qaırat Kelimbetov ózderiniń usynystaryn aıtty.
Sý sharýashylyǵy salasyn damytýǵa qatysty ekinshi másele boıynsha Ekologııa, geologııa jáne tabıǵı resýrstar mınıstri Serikqalı Brekeshov sóz sóıledi.
Mınıstrdiń baıandamasyn tyńdaǵan Memleket basshysy Ortalyq Azııa óńirinde sý máselesi qashanda óte ózekti bolǵanyn atap ótti. Onyń aıtýynsha, qazir bul saladaǵy jaǵdaı kúrt nasharlap, tipti, jahandyq máselege aınalyp otyr.
«Kolýmbııa klımattyq mektebine qarasty Jer ınstıtýtynyń zertteýi boıynsha Tıan-Shan taýlarynda jaýyn-shashynnyń azaıý qaýpi bar. Al bul sýarmaly egistikter men jaıylymdarǵa qajetti tushy sýdyń tapshylyǵyn týdyrady degen sóz. Taý basyndaǵy jyl boıy jatatyn qardyń kólemi azaıyp barady. Ǵalymdar aldaǵy jıyrma jylda qar budan da tez erýi múmkin degen boljam jasap otyr», dedi Qasym-Jomart Toqaev.
Prezıdenttiń aıtýynsha, syrtqy sý aǵynynyń azaıýy sýdy tıimsiz paıdalanýdyń saldarynan ýshyǵa túsýde. Onyń pikirinshe, sý resýrstary jaǵdaıyna memlekettik monıtorıng júrgizý isin kúsheıtý qajet.
«Aǵyn sýlardyń rejımi men sý qoımalaryn zertteý úshin 800 gıdrologııalyq beket qajet bolsa, sonyń 310-y ǵana jumys istep tur. Tolyqqandy memlekettik sý kadastry joq. Bul sý resýrstarynyń mólsheri men sapasyna monıtorıng jasaýǵa jáne ekonomıkanyń salalaryn sýmen qamtamasyz etý jónindegi naqty teńgerimge qol jetkizýge múmkindik bermeıdi», dep Memleket basshysy.
Sonymen qatar Qasym-Jomart Toqaev sýdy paıdalaný salasyndaǵy vedomstvoaralyq úılestirý jumystarynyń nashar júrgizilip jatqanyn synǵa aldy. Memleket basshysy sý sharýashylyǵy ınfraqurylymyn túrli memlekettik organdar basqaratynyn atap ótip, sonyń saldarynan sý resýrstaryna qatysty tıimdi saıasat júrgizilmeı otyrǵanyn aıtty.
«Premer-Mınıstrdiń birinshi orynbasary janynan 2015 jyly qurylǵan Sý keńesiniń otyrysy bir-aq ret ótken. Alaıda bul keńes pikir almasatyn májilis organy ǵana emes, óziniń tıimdiligin kórsetip, sheshim qabyldaýy kerek. Qazirgi máselelerge basa mán berý sektordaǵy jaǵdaıdy qalpyna keltirý úshin júıeli sharalar qabyldaýǵa múmkindik bermeı otyr. Transshekaralyq ózenderde sý bólý máselesi boıynsha Qazaqstannyń kelissóz júrgizýdegi ustanymy álsiz bolýy osyǵan baılanysty. Ishki sý saıasaty myqty bolmasa, kórshi eldermen tıisti sý dıplomatııasyn qurý múmkin emes», dedi Prezıdent.
«Jańa ekonomıkalyq saıasat» máselesi boıynsha Ulttyq ekonomıka mınıstri Álibek Qýantyrov, Strategııalyq josparlaý jáne reformalar agenttiginiń tóraǵasy Áset Erǵalıev, «Atameken» Ulttyq kásipkerler palatasy prezıdıýmynyń tóraǵasy Raıymbek Batalov, Prezıdenttiń shtattan tys keńesshisi Sýma Chakrabartı baıandama jasady.
Memleket basshysynyń pikirinshe, buryn-sońdy bolmaǵan jahandyq syn-qaterler júrgizilip otyrǵan ekonomıkalyq saıasatty tolyǵymen qaıta zerdeleýdi talap etedi.
«Biz alǵa qoıǵan maqsattarǵa qol jetkizý tásilderin ózgertemiz. Máseleniń máni osynda. Sondyqtan jobada jalpy baǵyttar men urandardyń ǵana kórsetilgeni emes, sondaı-aq naqty baǵyttar, jańa ádisterdiń jobasy berilgeni de óte mańyzdy. Sonymen qatar pysyqtaýdy qajet etetin birneshe másele bar. Birinshi, meniń oıymsha, qujatty naqtylaı túsý qajet. Mysaly, árbir baǵyt boıynsha iske asyrylýǵa tıis ekonomıkalyq reformalar tiziminiń úlgisi jáne olardyń mindetteri men maqsattary kórsetilýi kerek. Sondaı-aq jobada tehnologııalyq jańǵyrý jáne ınnovasııalardy engizý tásilderi naqtylanbaǵan. Jańa jaǵdaıda ınnovasııalyq saıasat qandaı bolýǵa tıis? О́kinishke qaraı, bul máselede naqty ustanym joq. Ekinshiden, qujat aıasynda «Samuryq-Qazyna» qory men «Báıterek» holdınginiń rólin anyqtaý qajet. Bular ekonomıka úshin de, memlekettik saıasat úshin de óte mańyzdy sýbektiler. Sondyqtan olardyń jumysyn durys júrgizý arqyly búkil ekonomıkalyq saıasattyń tıimdiligin anyqtaýǵa bolady»,dedi Qasym-Jomart Toqaev.
Prezıdent jalpy usynylǵan tásilderdi maquldady jáne búgingi talqylaýdyń nátıjelerin eskere otyryp, qujatty pysyqtaýdy tapsyrdy.