Amanat partııasynyń atqarýshy hatshysy Ashat Oralov Batys Qazaqstan oblysynda partııanyń saılaýaldy baǵdarlamasynyń aýyldyq eldi mekenderde oryndalý barysyn tekserdi. Al Oralda partııa aktıvimen jáne zııaly qaýym ókilderimen birqatar kezdesý ótkizip, aldaǵy referendýmnyń mańyzyn talqylady.
Terekti aýdanyna qarasty Magıstralnoe aýylynyń turǵyndary birneshe jyldan beri eldi mekenge kirer joldyń sapasyna shaǵymdanyp keledi. Bul másele partııanyń 2021 jylǵa arnalǵan aýdandyq saılaýaldy baǵdarlamasyn iske asyrýǵa arnalǵan Jol kartasyna da engizilgen edi. Alaıda jergilikti atqarýshy organ osy maqsatqa bıýdjetten qarajat bólmegen.
Jergilikti turǵyndarmen kezdesý barysynda Ashat Oralov partııanyń oblystyq fılıaly máslıhattaǵy Amanat fraksııasynyń depýtattarymen birlesip, bıylǵy bıýdjetti naqtylaý kezinde osy máseleni sheshýge qarajat bólýdi qamtamasyz etkenin jetkizdi. Jergilikti atqarýshy organ ókilderiniń málimetinshe, jyl sońyna deıin joldyń 1,8 shaqyrymy jóndeledi.
Budan soń partııanyń atqarýshy hatshysy Terekti aýylyndaǵy bir aýysymda 200 adam qabyldaıtyn aýdandyq emhananyń qurylysymen tanysty. Qazir medısınalyq mekeme ornalasqan ǵımarat 1972 jyly qonaqúı kesheni retinde paıdalanýǵa berilgen.
«Turǵyndardyń talap-tilegine sáıkes jańa ǵımarattyń qurylysy partııanyń saılaýaldy baǵdarlamasyna engizilgen. Bul áleýmettik mańyzdy nysan bolǵandyqtan Májilistegi Amanat fraksııasynyń depýtattary men Úkimet músheleri birlesip, qurylystyń merzimi men sapasyn turaqty baqylaýǵa alady. Qurylys aıaqtalǵannan keıin Terekti aýdanynyń 40 myńǵa jýyq turǵyny sapaly medısınalyq qyzmetke qol jetkizedi», dedi A.Oralov.
Osy kúni partııanyń Atqarýshy hatshysy sonymen qatar Oral qalasyndaǵy Daryndy balalarǵa arnalǵan №8 oblystyq mamandandyrylǵan mekteptiń ujymymen jáne oqýshylardyń ata-analarymen kezdesti. 2019 jyly mektep ǵımaraty apatty dep tanylyp, oqýshylar №37 orta mektepke aýystyrylǵan bolatyn. Ata-analardyń aıtýynsha, bul jaǵdaı qolaısyzdyq týǵyzyp, oqý prosesine de keri áser etip otyr. Ákimdiktiń málimeti boıynsha ótken jyly ǵımaratqa kúrdeli jóndeý júrgizýge jobalyq-smetalyq qujattama ázirlengen. Alaıda oblystyq bıýdjettik komıssııa ótinimdi qoldamady. Bul másele endi partııalyq baqylaýda jáne jýyq arada sheshimin tabady.
Oraldaǵy zııaly qaýym ókilderimen kezdesýde atqarýshy hatshy Amanat partııasy Konstıtýsııaǵa engiziletin ózgerister men tolyqtyrýlardyń mańyzdylyǵyn tereń túsine otyryp, aldaǵy referendýmdy ótkizýdi tolyq qoldaıtynyn atap ótti. Kezdesýge qatysýshylar da jalpyhalyqtyq referendým ótkizýdi qoldap, aımaq turǵyndarynyń oǵan belsendi qatysatynyna senim bildirdi.
«Ata Zańymyzdyń úshten bir bóligine ózgerister men tolyqtyrýlar engizilgeli otyr. Otandastarymyz osy saıası oqıǵanyń mán-mańyzyn túsinip, ózderiniń azamattyq ustanymyn kórsetetinine senimdimin», dedi M.О́temisov atyndaǵy Batys Qazaqstan ýnıversıtetiniń professory Qýandyq Mádir.
О́z kezeginde partııa ardageri Nurzııa Sısenbaeva aldaǵy referendým el damýynyń jańa múmkindikterine jol ashatynyn atap ótti. «Biz Prezıdenttiń tóńireginde toptasyp, qoǵam bolyp birigýimiz kerek. Jańa Konstıtýsııa Jańa Qazaqstanǵa bastaıtyn ózindik jol bolatynyna jáne qazaqstandyqtardyń búkilhalyqtyq referendýmǵa belsendi qatysatynyna senimdimin», dedi Nurzııa Sısenbaeva.
Sondaı-aq Oral qalasynda Amanat partııasynyń oblystyq aktıviniń jınalysy ótip, onda partııany transformasııalaý jáne jobalardy tıimdi júzege asyrý máseleleri talqylandy. Búginde óńirde 26 myńnan astam amanattyqty biriktiretin 219 bastaýysh partııa uıymy jumys isteıdi.