Qostanaı qalasynyń ortalyǵynda kópqabatty turǵyn úıdiń qurylysyn bastap jatqan qurylysshylar jer qazý jumystary kezinde 2,5-3 metr tereńdikte kómilip jatqan kirpishten qalanǵan eski jerasty jolynyń ústinen shyqty.
Jerasty tonneliniń bıiktigi júrelep otyrǵan adam syıyp ketetindeı. Ishi jartylaı topyraqqa tolyp, kirpish qabyrǵasyna ys jabysyp qalypty. Ystyń ıisi shyǵyp tur.
Qurylysshylardyń biri buryn metall quıatyn seh bolǵan shyǵar dep joramaldasa, endi biri Keńes ókimetiniń alǵashqy jyldary munda jylqy turatyn sharýashylyq ǵımarattary, odan keıin jóndeý zaýyty bolǵanyn aıtady. Sońǵy jyldary bul ashyq alańqaı avtoturaq retinde paıdalanylyp kelgen. Ne de bolsa, ekskavatorshynyń eski bir tarıhı nysandy arshyp alǵany aqıqat.
– 5 aprel kóshesiniń arǵy betinde kópes Kııatkınniń úıi tur. Saýdager Qazan tóńkerisi kezinde qymbat asyl qazynasynyń bárin osy mańaıǵa kómipti degen ańyz bar. Durystap bárin tekserip, qarańdar, qaıdan bilesiń, múmkin tabylyp qalar, – dedi qurylys basyna jınalǵan turǵyndardyń biri.
Jer astynan shyqqan joldyń naqty qashan salynǵanyn, nendeı qyzmet atqarǵanyn aldaǵy ýaqytta mamandar zerttep, anyq-qanyǵyna jete jatar. Ázirshe bizge belgilisi, bul jerge 19 qabatty turǵyn úı salynatyny ǵana.
Qostanaı oblysy