Májilis «Qazaqstan Respýblıkasynyń keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady, dep habarlaıdy Egemen.kz.
Zań jobasynda energııa aýdıtorlaryn attestattaý jónindegi memlekettik fýnksııany básekelestik ortaǵa berý, energııa aýdıti salasyndaǵy kásipkerlik qyzmetti keńeıtý jáne energetıkalyq aýdıttiń erikti sıpattaǵy «ekspress-energııa aýdıti» jáne «nysanaly energııa aýdıti» degen jańa túrlerin engizý jolymen energııa aýdıti júıesin jetildirý kózdeledi.
Memlekettik energetıkalyq tizilim sýbektileri energetıkalyq menedjment júıesi engen, energııa aýdıtiniń aldyńǵy qorytyndysy bolǵan jáne jyldyq energııa tutynýdy keminde 5%-ǵa tómendetý qamtamasyz etilgen jaǵdaıda mindetti energııa aýdıtiniń ornyna ekspress-energııa aýdıtinen óte alady.
Zań jobasyndaǵy birqatar túzetý sýbektilerge zań buzýshylyqtardy óz betinshe joıýǵa múmkindik berý maqsatynda sýbektilerge barmaı profılaktıkalyq baqylaýdy endirýge baǵyttalǵan.
Ekinshi oqylymdaǵy zań jobasymen jumys barysynda depýtattar:
- Memlekettik energetıkalyq tizilim sýbektileriniń sý tutyný monıtorıngi boıynsha normalardy saqtaýǵa;
- Memlekettik energetıkalyq tizilim sýbektileriniń tizbesin keńeıtýge;
- mindetti energııa aýdıtiniń ornyna ekspress-energııa aýdıtin júrgizý sharttaryn jeńildetýge;
- baqylaý sýbektilerine barmaı profılaktıkalyq baqylaý júrgizý tártibin naqtylaýǵa;
- energııa únemdeý jáne energııa tıimdiligin arttyrý salasyndaǵy habarlama berý tártibin naqtylaýǵa;
- energııa aýdıtorynyń quqyqtary men mindetterin belgileýdi kózdeıtin jeke bap engizýge baǵyttalǵan túzetýler engizdi.
Depýtattar «Elektr energetıkasy týraly» jáne «Tabıǵı monopolııalar týraly» Zańdarǵa respýblıkalyq mańyzy bar qalalardyń jylý elektr stansııalaryn balamaly energııa kózderine, atap aıtqanda gazǵa aýystyrý tetigin zańnamalyq bekitýge jáne elektr energııasynyń tapshylyǵyn jabýǵa baǵyttalǵan túzetýlerdi jeke blokpen engizdi.
Osy normalarda otynnyń balamaly túri retinde gazdy paıdalaný arqyly generasııalaıtyn qondyrǵylardy sala otyryp, jańǵyrtýǵa, rekonstrýksııalaýǵa jáne keńeıtýge ınvestısııalyq kelisimder jasasý kózdeledi.
Zań jobasy Senattyń qaraýyna jiberildi.