Aqmola jáne Pavlodar oblystarynda úı janýarlaryna jasalǵan zerthanalyq zertteýler kezinde paragrıpp-3, nodýlıarlyq dermatıt, kontagıozdy plevropnevmonııa, pasterellez, vırýstyq dıareıa jáne aýsyl sııaqty aýrýlar anyqtalǵan joq. Bul týraly Aýyl sharýashylyǵy mınıstrligi habarlady.
Aýyl sharýashylyǵy mınıstrliginiń Veterınarııa boıynsha ulttyq referenttik ortalyǵy osy jyldyń 14 qańtarynda Qaraǵandy oblysynda aýsyl oshaǵyn tirkegeni esimizde. Kóp uzamaı Shet aýdany Kıikti aýyldyq okrýgi ákiminiń sheshimimen sharýa qojalyǵyna karantın qoıylyp, baılanysta bolǵan barlyq janýar joıyldy. Sondaı-aq dezınfeksııalaý jumystary júrgizildi.
Tıisinshe, mınıstrliktiń Veterınarııalyq baqylaý jáne qadaǵalaý komıteti janýarlardyń densaýlyǵyn qorǵaý jónindegi dúnıejúzilik uıymǵa aýsyl aýrýy týraly dereý habarlady. Osyǵan baılanysty Dúnıejúzilik janýarlar densaýlyǵyn qorǵaý uıymy vaksınalaýsyz aýsyl boıynsha salamattylyq mártebesin toqtatty, al ımporttaýshy elder (Reseı, Qytaı, Belarýs jáne t.b.) Qazaqstannan tiri janýarlardy, janýarlardan alynatyn ónimder men shıkizatty eksporttaýǵa qatysty shekteý sharalaryn engizdi. Bul qazaqstandyq eksporttaýshylardyń lobbıiniń joqtyǵyn kórsetti.
«Mınıstrlik jergilikti atqarýshy organdardyń veterınarııalyq qyzmeti aýyl sharýashylyǵy qurylymdarynyń veterınarııalyq dárigerlerimen birlesip, aýsyl boıynsha jaǵdaıdy turaqtandyrýdy qamtamasyz etý úshin jumys júrgizdi. Reseıdiń veterınarlyq jáne fıtosanıtarlyq qadaǵalaý jónindegi federaldyq qyzmetiniń hattaryna sáıkes, bıyl sáýir aıynan bastap Qazaqstan aýmaǵynan taǵamdyq kollagen óndirý úshin iri qara mal terilerin ákelýge ruqsat etildi. Sonymen qatar Veterınarııalyq baqylaý jáne qadaǵalaý komıteti epızootııalyq saýlyqty saqtaý úshin Qazaqstannyń ortalyq aımaǵynda aýyl sharýashylyǵy janýarlaryn vaksınalaý týraly sheshim qabyldady. Bul týraly Dúnıejúzilik janýarlar densaýlyǵyn qorǵaý uıymyn habardar etti», delingen vedomstvonyń habarlamasynda.
Aıta ketý kerek, janýarlar aýrýy týraly kúdik týyndaǵan jaǵdaıda veterınarlyq qyzmetter akkredıttelgen zerthanalarda zertteletin bıologııalyq materıaldyń synamalaryn alady. Aqmola jáne Pavlodar oblystarynan kelgen aýrý janýarlarǵa zerthanalyq zertteý nátıjelerine sáıkes ınfeksııalyq rınotraheıt ornatyldy. Nátıjesinde, shekteý sharalary engizilip, qazir qajetti jumystar júrgizilip jatyr. Zertteýlerdiń nátıjesinde paragrıpp-3, nodýlıarlyq dermatıt, aýsyl, kontagıozdy plevropnevmonııa, pasterellez jáne vırýstyq dıareıa sııaqty aýrýlar anyqtalmady. Jalpy, elimizde aýsyl boıynsha epızootııalyq jaǵdaı turaqty.