Belgili jazýshy Estaı Myrzahmetovtiń uly Abaı marqum elge tanymal kásipker edi. Birde sol kisimen suhbattasqanymda: «Bizdiń kóbimiz úı ishinde ǵana patrıotpyz. Ádemi sóılep, ádemi tilek aıtamyz. Al is júzine kelgende, buraý basyn syndyratynymyz neken-saıaq. Bizdiki – «dastarqandyq patrıotızm» ǵoı...», degen edi.
Ákesinen sheshendik daryǵan birtýar azamattyń jadymda jattalyp qalǵan sózderi Qyzyljar óńirinde ótken senbilikten soń esime qaıta tústi. Ras, eńbek ujymdarynyń bári óz basshylarynyń bastaýymen qoldaryna tyrnaýysh pen kúrek ustap, kóshege shyǵyp, mekemeleriniń mańaıyn tártipke keltirdi. Al turǵyn úılerdiń mańy she? Oblys ortalyǵynyń ózim turyp jatqan tusyndaǵy kóp páterli úılerdiń kóbiniń mańyna adam qoly tımeı, qystan keıingi bylyqqan kúıinde jatqandyǵyn baıqadym.
Al ózim bolsam, mekemede ótkizilgen senbilikten keıin oblystyq máslıhattyń depýtaty degen dardaı ataǵym bar ekenin oıyma alyp, ózimnen ózim uıalǵandyqtan, kóp páterli úıimniń mańyndaǵy qystan qalǵan qoqysty jalǵyz ózim tazalaýǵa kiristim. Shamasy, meniń bul isimdi óz páterleriniń terezelerinen kórgen bolýlary kerek, birazdan soń birneshe jas jigit syrtqa shyǵyp, júrginshiler jolynyń eki jaǵynda shashylyp jatqan bótelkeler men turmystyq qaldyqtardy jınaı bastady. Áp-sátte úıimizdiń mańaıy tazaryp shyǵa keldi.
...Toı-tomalaqtarda jurttyń aldyna shyǵyp, aýzymyzdy toltyryp: «...Elimiz kórkeıe bersin!» dep kósiletinimiz bar. Ondaı sóz aıtýǵa moraldyq quqymyz bolýy úshin eń áýeli úıimizdiń mańyn kórkeıtip alǵanymyz jón emes pe?!. «Dastarqandyq patrıotızm» degen, mine, osy eken, aǵaıyn.
Káribaı MUSYRMAN,
Soltústik Qazaqstan oblystyq
máslıhatynyń depýtaty.
PETROPAVL.