Osy jylǵy 1 maýsymdaǵy jaǵdaı boıynsha respýblıkanyń 434 kásipornynda 8,8 myń jumyskerge jalaqy boıynsha bereshegi bary anyqtaldy, dep habarlaıdy Egemen.kz Eńbek jáne halyqty áleýmettik qorǵaý mınıstrligine silteme jasap.
«Jyl basynan beri memlekettik eńbek ınspektorlary 6,8 myńnan astam jumyskerdiń quqyǵyn qorǵady. Osy jylǵy 1 maýsymdaǵy jaǵdaı boıynsha memlekettik eńbek ınspektorlary respýblıkanyń 434 kásipornynda 8,8 myń jumyskerdiń aldynda 1 mlrd 996 mln teńgeden astam somaǵa jalaqy boıynsha bereshekti anyqtady», delingen vedomstvo habarlamasynda.
Osy kásiporyndardyń basshylaryna oryndalýy mindetti 298 nusqama berilip, 52,5 mln teńgeden astam somaǵa aıyppul salynǵan.
«Qabyldanǵan sharalar, sonyń ishinde jalaqy boıynsha bereshekti óteýdiń qatań saqtalýy tıis kesteleri men merzimderin belgileý nátıjesinde 6,8 myńnan astam jumyskerdiń quqyǵy qorǵaldy. Olarǵa 1 mlrd 754,5 mln teńge tólendi», dep tolyqtyrdy mınıstrlik.