Jalǵan aqparat sotqa aparady

Ishki ister organdaryna jyl basynan beri «telefon ter­rorshylarynan» qansha jal­­ǵan aqparat kelip tústi? Olardy qandaı jaza kútip tur? Halyqty úreılendirýdi ádetke aı­naldyrǵandarmen kú­res qalaı júrgizilip jatyr? IIM Ekstremızmge qarsy is-qımyl departamenti basqarma basshysynyń orynbasary Spartak Qabdenov baspasóz más­lıhatynda osy suraqtarǵa jaýap berdi.

«Jarylǵysh zat qoıyl­ǵan­dy­ǵy týraly jalǵan aqparat taratý – jaı ǵana buzaqylyq emes, qylmystyq jaýapqa tartylatyn áreket», deıdi IIM ókili. Onyń aıtýynsha, telefonmen ótirik málimet beretinder bul qylyqtarynyń qanshalyqty aýyr ekenin saralap jatpaıdy. Mundaı áreketti adamdar kóbine erikkennen, ázil retinde nemese mas kúıde jasaıdy eken.

«Jyl bastalǵaly beri 5 aıdyń ishinde Qylmystyq ko­dek­stiń 273-baby boıynsha isteri sotqa joldanǵan 12 adam­nyń 11-i qylmysty mas kúıde jasaǵan. «Jalǵan terrorıstiń» áleý­met­tik portretine toq­tal­sam, barlyq qylmystyń 88 pa­ıyzyn jumyssyzdar ja­sa­ǵan», dedi S.Qabdenov. IIM ókili taratqan málimetterge qaraǵanda, bıyl ashylǵan 19 qylmystyń 15-in jumyssyzdar jasaǵan eken. Sonymen qatar keıingi kezderi jarylǵysh zat týraly habarlamalardy «telefon ter­ro­rısteri» kek alý maqsatynda ne­mese jurt­ty áýre-sarsańǵa salý úshin bas­qa adamnyń atynan joldaýdy jıi­letken.

«Áleýmettik jelilerdiń, mes­­­send­jer­lerdiń basqa da aq­pa­rattyq tehno­lo­gııanyń da­mýy­na baılanysty jal­ǵan ha­bar­la­malardyń ınternet ar­qy­ly joldanýy kúrt ósti. Osy jyl­dyń 5 aıynda elektrondy habarlamalar joldaý boıynsha 35 qylmystyq is qozǵaldy. Máse­len, ótken jyly terrorızm aktisi týraly 73 jalǵan ha­bar tirkelse, bıylǵy 5 aıda ǵana bul sanattaǵy qyl­mys­tyq isterdiń sany 72-ge jetti», dedi mı­­­nıstrlik ókili jaǵdaıdy tú­sin­­­dirip.

Spartak Qabdenovtiń aı­týyn­sha, osy sıpattaǵy qyl­mys­tar­dy ashý ońaıǵa soq­paıtyn kórinedi. Sebebi aqpa­rattyń aq-qarasyn anyq­taý ishki ister organdary qyz­met­kerleriniń aıtarlyqtaı ýa­qy­tyn alady.

«Naýryz aıynda kóliktegi polısııa departamenti Qostanaı oblysynyń qyzmetkerlerimen birlesip, Almaty jáne Nur-Sultan qalalaryndaǵy ár­túrli 36 obektiniń elektrondy poshtalaryna jalǵan habar joldaǵan qostanaılyq tur­ǵyn­dy ustady. Qa­zir­gi ýa­qyt­ta qylmystyq is sotqa joldandy. Sondaı-aq Atyraý oblysynda da bir oqý­shy sabaqtyń shyr­qyn buzý úshin mekteptiń elektrondy posh­ta­syna habarlama joldaǵan. Jalpy, mejeli merzimde tergeý aıaqtalyp, 12 qylmystyq is sotqa joldan­dy. 5 adamǵa qatysty sot úkimi shyqty, eki adam bas bos­­tan­dy­ǵynan aıyrýǵa, eki adam­nyń bostandyǵyna shekteý qoıýǵa, bir adamdy shartty merzimge sottaý jóninde sheshim shyqty», dedi IIM ókili.

Jalpy, mundaı qyl­mys­tar­dy mektep oqýshylary da ádeıi uıym­das­ty­ry­p jatatyn jaǵ­daı­lar kezdesedi. Osy oraıda ata-analar 14 jasqa tol­ǵan balanyń jaýapkershilikten qa­­shyp qutyla almaıtynyn qa­perinen shy­ǵar­ma­sa deısiń.