Elordanyń mańaıyndaǵy Aqqaıyń aýylynda ornalasqan Qazanat at sporty klýbynyń janynan boı kótergen ashyq aspan astyndaǵy sadaq atý ortalyǵy óz jumysyn bastady. Respýblıka boıynsha alǵashqylardyń biri bolyp ashylǵan sadaq atý ortalyǵynda balalar men eresekter ulttyq sportymyzben erkin aınalysa alady.
Is-sharanyń ashylý saltanatyna bokstan London Olımpıadasynyń chempıony Serik Sápıev, Ulttyq sport qaýymdastyǵynyń atqarýshy dırektory Rahat Jaqsybaı, Qazaqstan dástúrli sadaq atý federasııasynyń vıse-prezıdenti Dıas Ahmetov jáne Sadaq atý federasııasynyń ókilderi qatysty.
Jıynda sóz alǵan Dıas Ahmetov bul ortalyq atqa minýdi jaqsy kóretin adamdar úshin taptyrmas múmkindik ekenin aıtady. Sonymen qatar bolashaqta bul jerde at sportyn súıer qaýymynyń qalaýymen dástúrli sadaq atý kýrstary ótedi deıdi.
– Dástúrimizdi jańǵyrtyp, rýhymyzdy oıatyp, atqa minip, sadaq atýǵa mashyqtanatyn ortalyq búginnen bastap óz jumysyn bastady. Bul jerge kelýshilerge tólem úshin arnaıy keste shyǵarylady. Baǵasy turǵyndar úshin qoljetimdi bolady. Ortalyq aptanyń juma, senbi jáne jeksenbi kúnderi halyqqa yńǵaıly ýaqytta jumys isteıdi. Sondaı-aq sadaq atýǵa qatty qyzyqqan, jıi kelýdi qalaǵan adamdarǵa arnaıy keste jasalady. Barlyǵyn ózimizdiń áleýmettik jelidegi paraqshalarymyzda jarııalaımyz. Sadaq atý ortalyǵy ázirshe tek jaz mezgilinde ǵana jumys isteıdi. Aldaǵy ýaqytta qys mezgilinde de jumys isteýdi kózdep otyrmyz. Ol úshin at qoranyń ishindegi manejde arnaıy sadaq atý aımaǵyn uıymdastyramyz. Qysta manejdiń ishine nysanalar qoıylyp, úlken qashyqtyqta da sadaq ata alatyn bolady, – dedi Dıas Ahmetov.
Jalpy, dástúrli sadaq atý sporty Qazaqstanda qarqyndy damyp keledi. Mamandardyń aıtýynsha, sadaq atýdyń paıdasy óte mol. Ol adamǵa rýh berip, kózdiń de kórý qabiletin jaqsartady. Sonymen qatar adamdardy sabyrly bolýǵa, ózin-ózin tárbıeleýge, adam boıyna senimdilik uıalatýǵa kómektesedi.