Astana qalasynda Qazaqstan jastarynyń kongresi uıymdastyrýymen «Konstıtýsııalyq reforma: jastar úshin jańa múmkindikter» taqyrybynda dóńgelek ústel ótti. Jıynǵa jastar uıymdarynyń ókilderi, zańgerler, qoǵam qaıratkerleri men sarapshylar qatysyp, Negizgi zańdy jańǵyrtýdyń mazmuny men onyń jastar ómirine yqpaly talqylandy, dep jazady Egemen.kz.
Kezdesý barysynda Konstıtýsııalyq reformanyń negizgi erejeleri, jastardyń quqyqtary men múmkindikterin keńeıtý, azamattyq belsendilikti arttyrý, sondaı-aq sheshim qabyldaý úderisterine jastardy keńinen tartý máseleleri sóz boldy.
Is-sharany ashqan Kongrestiń atqarýshy dırektory Baqdaýlet Jandildaev qazirgi kezeńniń el tarıhyndaǵy aıryqsha mańyzyn atap ótti. Onyń aıtýynsha, Qazaqstanda Konstıtýsııalyq reforma júzege asyp, Konstıtýsııanyń jańartylǵan mátini keń qoǵamdyq talqylaýǵa usynylǵan. Jańa redaksııadaǵy Negizgi zań áleýmettik memleket qaǵıdattaryn kúsheıtip, barlyq azamatqa, sonyń ishinde jastarǵa da bilim alý, eńbek etý jáne ózin-ózi damytý salalarynda teń múmkindik berýge baǵyttalǵan.
Zańgerler jańa Konstıtýsııanyń tujyrymdamasyn talqyǵa saldy
Dóńgelek ústelde Konstıtýsııalyq reforma jónindegi komıssııanyń múshesi, Astana qalasy Qoǵamdyq keńesiniń tóraǵasy, Qazaqstan Respýblıkasynyń Ulttyq quryltaıy múshesi Zulfuhar Ǵaıpov sóz sóılep, jańa Konstıtýsııa jobasynyń ázirlený barysyna toqtaldy. Onyń aıtýynsha, qujat azamattardan, saıası partııalardan, qoǵamdyq uıymdar men sarapshylardan túsken usynystardy keshendi taldaý jáne ashyq qoǵamdyq talqylaý nátıjesinde daıyndalǵan.
«Keıingi jyldary elimizde «Ádiletti Qazaqstan» ıdeıasyn iske asyrý úshin saıası júıeni jańǵyrtýǵa baǵyttalǵan aýqymdy reformalar júrgizilip jatyr. Bul ózgeristerdiń ózegi – halyqtyń memlekettik basqarý isine tikeleı ári mazmundy qatysýyn qamtamasyz etý», dedi ol.
«BAITAQ» partııasy «Ekologııa jáne adam densaýlyǵy» uǵymyn memlekettiń bazalyq qundylyǵy retinde bekitýdi usyndy
О́z kezeginde «Jasyl El» eńbek jasaqtarynyń respýblıkalyq shtabynyń jetekshisi Nurasyl Bekmatov Konstıtýsııalyq ózgeristerdiń azamattyq jaýapkershilikti qalyptastyrýǵa yqpalyn atap ótti. Ol jastar arasynda ekologııalyq mádenıetti damytýdyń mańyzyn aıta kelip, «Taza Qazaqstan» bastamasyna erekshe toqtaldy.
«Ekologııalyq mádenıet zańmen ǵana emes, eń aldymen sana men tárbıe arqyly ornyǵady. Jastar «Taza Qazaqstan» sııaqty bastamalarǵa qatysý arqyly qorshaǵan ortany qorǵaýǵa jáne týǵan jerge janashyrlyq tanytýǵa naqty úles qosa alady», dedi spıker.
Vıse-prezıdent jáne Halyq keńesi: Jańa Ata Zań jobasy Varshavada tanystyryldy
Jıynda Konstıtýsııalyq reformanyń ıdeologııalyq negizderi de talqylandy. Baqdaýlet Jandildaev Konstıtýsııa Preambýlasynyń mańyzyn atap, dál osy bólim Negizgi zańnyń qundylyqtyq jáne mazmundyq baǵytyn aıqyndaıtynyn aıtty. Onyń pikirinshe, jańartylǵan Preambýlada tarıhı jolyn tereń túsinetin, bolashaqqa nyq qadam basqan, jaýapty Qazaqstannyń beınesi aıqyn kórinedi. Bul túzetýler formaldy sıpattaǵy ózgeris emes, qoǵam suranysy men ýaqyt talabynan týǵan sanaly tarıhı tańdaý.
Parlamenttiń 90%-y qazaqsha sóıleıdi: Depýtat Memlekettik til zańnamasyn jetildirý qajet ekenin aıtty
Sondaı-aq «Astana jastary» jastar resýrstyq ortalyǵy bóliminiń jetekshisi Araılym Saparalı Konstıtýsııanyń memleket pen qoǵam damýynyń negizi ekenine toqtaldy.
«Konstıtýsııa – elimizdiń negizi. Qoǵam damyǵan saıyn zań da zaman talabyna saı jańaryp otyrýy qajet. Usynylyp otyrǵan reforma ádildikke, zań ústemdigine jáne ashyq memleket qurýǵa baǵyttalǵan. Referendým – halyqtyń, sonyń ishinde jastardyń da, óz tańdaýyn jasaýyna múmkindik. Jastar beıjaı qalmaı, belsendilik tanytyp, bul úderisterge jaýapkershilikpen qaraýy tıis», dedi ol.
Dóńgelek ústel aıasynda «suraq-jaýap» formatynda ashyq pikirtalas ótip, qatysýshylar quqyqtyq jáne áleýmettik bastamalar jóninde oı bólisti, Konstıtýsııalyq ózgerister jaǵdaıynda jastar saıasatyn odan ári damytýǵa qatysty usynystaryn ortaǵa saldy.