Qıyr-shıyr joldar shartarapqa tartylǵan jol ótindegi Mańǵystaýda jol jaǵdaıyn jiti jáne turaqty nazarda ustamasa búgingi joldyń erteń-aq tozyp keteri anyq. Biraq óńirde kásibı jol mamandarynyń jetispeýshiligi jyldar boıy sheshimin tappaı keledi.
«Jol aktıvteri ulttyq sapa ortalyǵy» RMK oblystyq fılıalynyń baspasóz hatshysy Talǵat Ádildiń aıtýynsha, 2021 jyly ortalyq tarapynan barlyq oblystaǵy ákimdikterde jolaýshylar kóligi jáne avtomobıl joldary bólimi qyzmetkerlerine taldaý júrgizilgen.
– Barlyǵy 1 600-ge jýyq adamnyń jergilikti atqarýshy organdarda jol salasyna qatysty bólimde jumys isteıtini belgili boldy. Biraq olardyń ishinde 190 adamnyń ǵana jol mamandyǵy boıynsha sáıkes dıplomy bar. Ras, Mańǵystaýda da jol qurylysynyń qyr-syryn biletin maman tapshy. Olqylyqty túzetý úshin bıyl sáýir aıynda Aqtaýda kásibı biliktilikti arttyrý semınaryn ótkizdik, – deıdi T.Ádil.
Bıyl sáýir aıynda Aqtaýda kásibı biliktilikti arttyrý maqsatynda ótkizilgen semınarǵa aýdan-qala ákimdikteriniń qyzmetkerleri men avtojoldardy salýshy merdiger mekemelerdiń mamandary qatysty. Olar avtomobıl joldaryn jóndeý nemese qaıta tóseý boıynsha jańa tehnologııalardy qoldanýdy úırenip, jalpy osy saladaǵy sońǵy jańalyqtarmen tanysty. Semınarǵa qatysýshylardyń suraýy boıynsha bıyl osyndaı is-shara taǵy ótkizilmek.
Mańǵystaýlyq joldardyń sapasyn baqylaýshylar Reseıge, sondaı-aq Nur-Sultan, Almaty jáne Shymkent qalasynda ótken biliktilik arttyrý semınarlaryna baryp júr. Odan jınaqtaǵan tájirıbesin búginde bólisýde.
«Jol aktıvteri ulttyq sapa ortalyǵy» RMK mamandar tapshylyǵyn azaıtý jumystaryn qolǵa aldy. 2020 jyly ulttyq ortalyqtyń bas dırektory Z.Saǵynovtyń bastamasymen «1000 mektep» jobasy júzege asqan. Aqtaý qalasy, Munaıly, Túpqaraǵan, Beıneý aýdandary boıynsha 101 mektepke baryp, 9-11 synyp oqýshylarymen kezdesý ótkizip, 2020-2021 jyldary barlyǵy 3 myńǵa jýyq oqýshyny qamtyǵan. Bıyl bul aksııa «2000 mektep» ataýymen jalǵasýda. Ár aýdan men aýyldy jyl sońyna deıin tolyq qamtý josparlanǵan. Sondaı-aq fılıal ǵımaratynda jol salasynda oqyp jatqan kolledj ben ýnıversıtet stýdentterin aqyly óndiristik tájirıbeden ótkizý qarastyrylǵan. Sońǵy eki jylda Mańǵystaý polıtehnıkalyq kolledjiniń birneshe stýdenti osy múmkindikti paıdalanyp, ekeýi jol qurylysy salasyna jumysqa ornalasty.
– Bul baǵytta jumystar osy qarqynda jalǵasatyn bolsa, ıaǵnı jylyna mektep bitirýshiler arasynda 2-3 jas jol salasyndaǵy mamandyqty tańdasa, Qazaqstan boıynsha másele taıaý jyldary sheshiledi dep senemiz, – deıdi T.Ádil.
Mańǵystaý oblysy