Parlament Májilisiniń bir top depýtattary Úkimetke Uly Otan soǵysynyń ardagerlerin kommýnaldyq qyzmet tólemderinen bosatý týraly saýal joldaǵan edik. Sizdiń qolyńyz qoıylǵan jaýapta sol qaharman qarııalarǵa beriletin ortasha zeınetaqy, bazalyq zeınetaqy jáne arnaýly memlekettik járdemaqy eseptelip, osyny qanaǵat etsin degen emeýrin bildirilipti.
Másele onda emes qoı. Soǵys ardagerlerine ár aıda jıyp-terip beretin 60-70 myńdaı qarjy olarǵa el bolyp, memleket bolyp kórsetilýge tıis qurmettiń sadaǵasyna da jaramaıdy. Másele – shynaıy iltıpatta. Adamzatqa qasiret bolyp tóngen fashızmnen jer-jahandy qutqaryp qalǵan erlerdi, búgingi toqsandaǵy qarııalardy Uly Jeńistiń 70 jyldyǵy qarsańynda týǵan halqy men memlekettiń júrek jylýyna bóleıik degenbiz. Sony túsine almapsyzdar.
Qudaıǵa shúkir, parasatty azamattar bar eken. Qaraǵandy jáne Batys Qazaqstan oblystarynyń ákimderi ardagerlerdi álgi tólemderden bosatty. Shymkent te solaı jasap otyr, Alla rıza bolsyn.
Osy ıgi qadamdy elimizdiń ózge oblystary qostap áketse, qandaı ǵanıbet. Respýblıkada búginde Uly Otan soǵysynyń 4282 ardageri bar, ár óńirge 300-den keledi eken. Ekonomıkasy damý ústindegi aımaqtar úshin 200-300 qarııanyń kommýnaldyq muqtajyn sheship berý másele bolyp pa? Sizdiń tarapyńyzdan bir aýyz sóz aıtylsa jetkilikti ǵoı.
Áýlıe syndy qarııalar qan maıdanda erlikpen shaıqasty. Bizdiń erligimiz sol bolsyn, ardagerlerdi Uly Jeńistiń 70 jyldyǵy qarsańynda azamattyǵymyzben, eldigimizben qýantaıyq. Oryndy tilekke atústi qaramańyzdar.
Aldan SMAIYL,
Májilis depýtaty.