EQYU-nyń Is basyndaǵy tóraǵasy, Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev qaıta adam opatyna soqtyrǵan Qyrǵyzstannyń ońtústik Jalalabad oblysyndaǵy qaıǵyly oqıǵalarǵa baılanysty óziniń tereń alańdaýshylyǵyn bildirdi.
Q.Saýdabaev mynadaı málimdeme jasady:
“Men barlyq taraptardy zorlyq-zombylyqqa jol bermeı, aldaǵy ýaqytta qaqtyǵystyń aldyn alýǵa barlyq sharalardy qabyldaýǵa jáne týyndaǵan máselelerdi tózimdilik pen ymyraǵa kelý arqyly sheshýge shaqyramyn. Onyń ústine, ultaralyq qaqtyǵysqa múldem jol berilmeýi tıis. Qyrǵyzstandy daǵdarystan shyǵarýǵa jaǵdaı týǵyzatyn tártip pen zań ústemdigin, kelisim men qoǵamdaǵy turaqtylyqty tez arada qamtamasyz etý qajet.
Qazaqstan EQYU-nyń Qazirgi tóraǵasy retinde Qyrǵyzstandaǵy daǵdarystyń birinshi kúnnen bastap ony turaqtandyrýǵa barynsha kúsh-jiger jumsap keledi. Qyrǵyzstandaǵy kúrdeli áleýmettik-ekonomıkalyq jaǵdaıdy eskere otyryp, Qazaqstan Prezıdenti Nursultan Nazarbaevtyń sheshimimen ústimizdegi jyldyń 6 sáýirinde daǵdarys kezeńine qabyldanǵan Qazaqstan-Qyrǵyzstan memlekettik shekarasyndaǵy shekteýlerdi 20 mamyrdan bastap joıdy.
Bishkektegi EQYU Ortalyǵy eldiń soltústigindegi de, ońtústigindegi de máselelerdi sheshýde belsendi úles qosyp, jaǵdaı monıtorıngin turaqty jasap otyr.
Sońǵy ýaqytta jaǵdaıdy turaqtandyrýǵa qajetti kómek kórsetý maqsatynda Qyrǵyzstanda EQYU-nyń Is basyndaǵy tóraǵasy, EQYU-nyń Bas hatshysy M.P. de Brıshambo, EQYU Parlamenttik Assambleıasynyń tóraǵasy J.Soaresh, EQYU-nyń Ulttyq azshylyq isteri jónindegi Joǵarǵy komıssary K. Vollebek jáne Uıymnyń basqa da joǵary dárejedegi ókilderi boldy.
Men Qyrǵyzstan ýaqytsha úkimetiniń basshysy Roza Otýnbaevamen telefon arqyly sóılestim. Áńgime barysynda men ol eldegi aıaqtalmaı jatqan qaqtyǵystarǵa bizdiń alańdaýshylyǵymyzdy jetkizdim jáne EQYU-nyń, onyń ınstıtýttarynyń jáne Bishkektegi Ortalyǵynyń Qyrǵyzstanǵa tez arada daǵdarystan shyǵyp, ary qaraı konstıtýsııalyq damýǵa barynsha kómek kórsetýge daıyn ekendigin aıttym”.