Úndistanda 18 shildede ótken prezıdent saılaýynyń nátıjesi jarııalandy. Onyń qorytyndysy boıynsha jańa prezıdent qyzmetine Draýpadı Mýrmý taǵaıyndaldy. 64 paıyz daýys jınaǵan Draýpadı Mýrmý óziniń básekelesi birikken oppozısııa ókili Iаshvant Sınhadan ústem tústi.
Bul týraly Úndistan premer-mınıstri Narendra Modı óziniń Twitter paraqshasynda: «Shyǵys Úndistannyń shalǵaı bóliginde týǵan, taıpalyq qaýymnan shyqqan Úndistannyń qyzy bizdiń Prezıdent bolyp saılandy», degen jazbamen bólisti.
Úndistanda prezıdent jalpy halyqtyq saılaý arqyly tańdalmaıdy. El parlamentiniń joǵarǵy jáne tómengi palatalarynyń depýtattary, sondaı-aq 28 shtat pen eki odaqtyq aýmaqtyń zań shyǵarýshy ókilderi, shamamen 4 896 adamdy qamtıtyn saılaý okrýgi saılaıdy. Osylaısha, Draýpadı Mýrmý 25 shilde kúni ant berip, resmı túrde Úndistannyń HV prezıdenti bolyp saılandy.
«Táýelsizdiktiń 75 jyldyǵynda maǵan osy qyzmetke kelý baqyty buıyrdy. Bizge, táýelsiz Úndistan azamattaryna azattyq jolyndaǵy kúreskerlerimizdiń úmitin aqtaý úshin kúsh-jigerdi arttyrýǵa týra keledi», dedi Mýrmý ant qabyldaý rásiminde sóılegen sózinde.
Álemniń túkpir-túkpirinen memleket basshylary Úndistannyń jańa prezıdenti Mýrmýny quttyqtap arnaıy hattar joldap jatyr. Mýrmý – Úndistan tarıhynda ekinshi áıel prezıdent. Sondaı-aq áleýmettik satyda tómen turǵan taıpalardan shyqqan alǵashqy memleket basshysy.
1958 jyly Odısha shtatyndaǵy Maıýrbhandj aýdanynyń Baıdaposı aýylynda dúnıege kelgen Mýrmýdyń Úndistan táýelsizdigin alǵannan keıin týǵan alǵashqy prezıdent bolǵanyn da erekshe atap ótken jón. Sonymen qatar ol – 2015-2021 jyldar aralyǵynda Djarkhand gýbernatory qyzmetin atqarǵan alǵashqy áıel.
Esterińizge sala keteıik, buǵan deıin Pratıbha Patıl Úndistannyń 60 jyldyq tarıhynda 2007 jyly prezıdent bolyp saılandy. Ol 2012 jylǵa deıin el basqaryp, alǵashqy áıel prezıdent retinde tarıhta qaldy.
Úndistan prezıdentin el parlamenti eki palatasynyń músheleri men barlyq shtattardyń zań shyǵarýshy múshelerinen turatyn saılaýshylar alqasy besjyldyq merzimge saılaıdy. Saılaý proporsıonaldy ókildik júıesine sáıkes jasyryn daýys berý arqyly ótkiziledi. Budan aldyńǵy prezıdent Ram Nath Kovınd 2017 jyly saılanyp, besjyldyq qyzmetin tolyqtaı atqarǵan.
Jalpy, Úndistanda Prezıdenttiń eldegi ustanymy negizinen sımvoldyq sıpatqa ıe. Úndistan konstıtýsııasyna sáıkes, eldegi atqarýshy bılik premer-mınıstrdiń qolynda, biraq prezıdent federaldy jáne aımaqtyq deńgeıde úkimetterdiń qurylýyna áser ete alady.
Endigi kezekte Úndistannyń jańa premer-mınıstri saılanbaq. Saılaý tamyz aıynda ótedi dep josparlanyp otyr.