Aqtóbedegi T.Bıgeldınov atyndaǵy Áýe qorǵanysy kúshteri Áskerı ınstıtýtynyń jeke quramy eki márte Keńes Odaǵynyń Batyry, avıasııa general-maıory Talǵat Bıgeldınovtiń 100 jyldyq mereıtoıyn saltanatty túrde atap ótti. Oǵan ár jyldary osy oqý ornyn aıaqtaǵan túlekter, qorǵanys salasynyń ardagerleri, qazir oqyp jatqan kýrsanttar men olardyń ata-anasy qatysty.
Osy kúni ınstıtýt qabyrǵasynda Talǵat Bıgeldınov atyndaǵy murajaıdyń ashylý saltanaty da ótti. Áskerı ushqyshtar daıarlaıtyn elimizdegi jalǵyz oqý ornynda ótken saltanatty is-sharada Aqtóbe oblysy ákiminiń orynbasary Bulbul Eleýsinova óńir basshysynyń quttyqtaýyn jetkizdi. Quttyqtaýda bylaı dep jazylǵan: «Eki márte Keńes Odaǵynyń Batyry T.Bıgeldınov atyndaǵy Áýe qorǵanysy kúshteri Áskerı ınstıtýtynda qazaqstandyqtardan basqa Reseı Federasııasy men týysqan Ortalyq Azııa memleketterinen kelip oqyp jatqan jas kóp. Batyr babamyzdyń esimin ıelengen oqý ornynyń professorlyq-oqytýshylyq quramy óz isin jetik biletin áskerı ushqyshtar men ınjenerlerdi ǵana emes, Otanyn súıetin naǵyz patrıottardy da tárbıelep keledi. Otyz jyldan beri Táýelsiz Qazaqstannyń áskerı mamandaryn daıarlaý isinde osy oqý orny mamandarynyń eńbegi zor».
Bul oqý ornynyń eń birinshi túlekteri 1998 jyldyń 22 tamyzynda dıplom aldy. Sodan beri 2 500 ofıser daıarlanyp, olar búginde elimizdiń áskerı áýe keńistiginde jáne azamattyq avıasııa, qorǵanys salasynda abyroıly eńbek etip júr. Irgeli oqý ornyn Halyq Qaharmany, senator Talǵat Musabaev, elimizdiń Áýe qorǵanysy kúshteri Bas qolbasshysynyń jaýyngerlik jáne dene daıyndyǵy jónindegi orynbasary, polkovnık Talǵat Syzdyqov quttyqtady. Qarýly Kúshter ardagerler keńesiniń Aqtóbe oblysy boıynsha tóraǵasy, zapastaǵy polkovnık Qajymuqan Sátenov kýrsanttardy Ekinshi dúnıejúzilik soǵysta áýege 305 ret kóterilip, talaı ret ólimmen betpe-bet kelgen Talǵat Bıgeldınovtiń qaharmandyǵynan úlgi alyp, eldiń esti uldary bolýǵa shaqyrdy.
Áskerı ınstıtýttyń atshaptyrym aýmaǵyndaǵy bos turǵan ǵımaratta ashylǵan Talǵat Bıgeldınov atyndaǵy murajaıdy osy oqý ornyn 2002 jyly bitirgen 130 túlek jasaqtaǵan. Qazir munda Talǵat Bıgeldınovtiń ár jyldary Aqtóbege kelgen saparynda túsirilgen fotosýretter, gazet maqalalary, ushqysh kıimderi, ushaq maketteri, otandyq áskerı avıasııa tarıhyna qatysty túrli eksponat qoıylǵan. Osy oqý ornynyń 2002 jylǵy túlegi, polkovnık Murat Jákeshov batyr atyndaǵy murajaı ashý usynysyn ınstıtýt basshysy, avıasııa generaly Dáýren Qosanov birden qoldaǵanyn jetkizdi. Osy oqý ornynyń taǵy bir túlegi, SCAT áýe kompanııasynyń qazirgi dırektory Boeing747 ushaǵynyń maketin jiberse, azamattyq avıasııa salasynda qyzmet etip júrgen basqa túlekteri mýzeıdi qyzyqty eksponattarmen jabdyqtaýda belsendilik tanytqan. Sondaı uıymshyldyqtyń arqasynda az ýaqyttyń ishinde murajaı ekspozısııasy sırek jádigerlermen tolyqty.
Aqtóbe oblysy