Abaı oblysynda 100 myńnan asa adam medısınalyq saqtandyrý júıesinde tirkelmegen. Bul týraly taıaýda «Áleýmettik medısınalyq saqtandyrý» qorynyń Shyǵys Qazaqstan oblysyndaǵy fılıalynyń dırektory Ǵalymjan Ábilov aıtty.
Atalǵan qordyń negizgi mindeti – elimizdiń azamattaryn sapaly medısınalyq qyzmet túrlerimen qamtamasyz etý. Bul uıymmen shart jasasqan kez kelgen klınıkada onyń ornalasqan jeri men emdelýshiniń osy medısınalyq uıymǵa bekitilmegenine qaramastan MÁMS júıesiniń aıasynda keń spektrli medısınalyq qyzmetterdi alýǵa bolady. Alaıda ol úshin kez kelgen azamattyń saqtandyrylý mártebesi bolýy mindetti.
Qor ókilderi aıtqandaı, qazir Abaı oblysynda turatyn 600 myńnan asa halyqtyń 17%-ynda nemese 114 047 adamda medısınalyq saqtandyrýy joq. Sondyqtan quzyrly organdarmen birlesip, qazir bul baǵytta emhanalarda jáne saqtandyrý júıesinde tirkelmegen halyqty keńinen qamtý boıynsha jumystar qolǵa alyndy. Jeke jáne zańdy tulǵalarmen de MÁMS júıesiniń mańyzdylyǵy jóninde túsindirý jumystary júrgizilip jatyr.
«Bıyl Abaı oblysynyń halqyna medısınalyq kómek kórsetýge 64 jetkizýshimen kelisimshart jasalyp, bul maqsatta 64,2 mlrd teńge qarastyrylyp otyr. Onyń ishinde TMKKK – 36,1 mlrd teńge, MÁMS – 28,1 mlrd teńge. 6 aıda ıgerilgen qarajattyń mólsheri – 40,7 mlrd teńge, onyń ishinde Tegin medısınalyq kómektiń kepildik berilgen kólemi boıynsha 23,1 mlrd teńge, MÁMS júıesine 17,5 mlrd teńge tıesili», dedi Ǵ.Ábilov.
Esepti kezeńde medısınalyq uıymdarda stasıonarlyq kómekke baılanysty MÁMS qarajaty esebinen 17 myńǵa jýyq operasııa júrgizilip, onyń ishinde joǵary tehnologııalyq medısınalyq kómek 518-ge jetken. Byltyr uqsas kezeńde tyń medısınalyq tehnologııalardy qoldanyp jasalǵan hırýrgııalyq qyzmet mólsheri MÁMS qarajaty esebinen 16 myńǵa jýyqtap, onyń ishinde joǵary tehnologııalyq medısınalyq kómek – 117 operasııany quraǵan. Byltyrǵy kezeńmen salystyrǵanda, bıyl hırýrgııalyq aralasýlardyń kórsetkishi ósip, joǵary tehnologııalyq medısınalyq operasııalardyń edáýir ulǵaıýy baıqalady.
Bıylǵy monıtorıng nátıjelerine sáıkes esepti kezeńde atalǵan qordyń sarapshylary 22 myń buzýshylyqty anyqtaǵan. Aıyppuldardy esepke alǵanda onyń somasy – 564,2 mln teńge. Onyń ishinde is júzinde kórsetilmegen qyzmetter boıynsha aıyppuldardy birge eseptegende 279 jaǵdaıda – 1,4 mln teńgege jetken.
Qordyń ókilderi ásirese nysanaly toptardaǵy pasıentterdi dári-dármekpen qamtamasyz etýge erekshe basymdyq berilgenin jetkizdi. 2022 jylǵa ambýlatorlyq dári-dármekpen qamtamasyz etýge 4,6 mlrd teńge bólinip, onyń 4,4 mlrd teńgesi Tegin medısınalyq kómektiń kepildik berilgen kólemi, sondaı-aq MÁMS aıasynda 0,2 mlrd teńge baǵyttalypty.
Abaı oblysy