Bolashaqqa qamqorlyqtyń úlgisi

Prezıdent halyqqa arnaǵan Joldaýynda mektepke deıingi bilim berý júıesine aıryqsha kóńil bólip, mektepke deıingi tárbıe jumysy basty nazarda bolýy kerek ekenin aıtty. Biz «Balapan» baǵdarlamasy arqyly 3 pen 6 jastaǵy balalardy balabaqshamen 100 paıyz qamtı aldyq. Osyndaı kórsetkishke memleket-jekemenshik áriptestigi negizinde qol jetkizdik. Biraq Memleket basshysy másele retinde kótergendeı, ekiden alty jasqa deıingi balalardyń jartysynan kóbi ǵana balabaqshaǵa barady. Mundaı olqylyqqa jol berýge bolmaıdy. Sol sebepti de Qasym-Jomart Kemeluly balalardy balabaqshamen qamtamasyz etý máselesin túpkilikti sheshýdi tapsyrdy. Bul rette bizdiń «Qarlyǵash» balabaqshasy mem­lekettik saıasatpen úndestikte jumys istep otyr dep aıta alamyn, óıtkeni biz balalardy 2 jastan bastap qabyldaımyz. Árıne, el kóleminde osy máseleni sheshý úshin kásipkerlik tarapynan da janashyrlyq pen qoldaý qajet.

Kez kelgen salanyń damýy ondaǵy kadrlardyń kásibıligine tikeleı táýeldi. Balalardy 2 jastan bastap tolyǵymen mektepke deıingi bilimmen qamtamasyz etip, balabaqshalardy kóptep ashýǵa qol jetkizermiz. Degenmen salaǵa bilikti kadrlar tartpaıynsha júıeni laıyqty jetildirý qıynǵa soǵady. Máseleniń osyndaı ekinshi jaǵyn da eskergen Memleket basshysy osy jolǵy Joldaýynda tárbıeshilerdiń áleýmettik mártebesin arttyryp, jalaqysyn kóbeıtý kerektigin, osy saladaǵy mamandarǵa qoıylatyn naqty talaptar bekitilýge tıis ekenin atap kórsetip, olardyń jumys júktemesin de birtindep azaıtqan jón bolatynyna nazar aýdardy. Al tárbıeshilerdiń áleýmettik mártebesi artyp, jalaqysy ósse, kásibı kadrlar kóptep tartylady. Osyndaı júıeli jumystyń nátıjesinde ǵana mektepke deıingi tárbıe men oqytý sapasy artady.

Beıbitgúl QAZAQPAEVA,

Prezıdent Is basqarmasynyń Medısınalyq ortalyǵyna qarasty «Qarlyǵash» balabaqshasynyń dırektory

NUR-SULTAN