О́zimiz zeınet jasynda bolsaq ta, kóp jyl ustazdyq etkendikten, bir qulaǵymyz qashanda mektep jaqqa túrýli júredi jáne ondaǵy keıbir jaǵdaılar bizdi de aıtarlyqtaı alańdatady. Sońǵy eki jyldaǵy koronavırýstyń áýre-sarsańy mektepterdegi oqytý úderisine de óte-móte kedergi bolǵanyn bilemiz. Áıtse de odan burynǵy Bilim mınıstrleriniń ár úsh jylda aýysyp, árqaısysy mektep baǵdarlamasyna óz «jańalyǵyn» engizip, oqýshynyń mıyn atala etkeninen de habardarmyz.
Mektep oqýshylarynyń keńestik kezeńde bilimge qushtarlyǵy óte joǵary edi. Sondyqtan da keńes ǵalymdary men ınjenerleri álemdik reıtıngte eń aldyńǵy qatardan oryn alatyn. Balalardyń oqý-bilimge degen salǵyrt kózqarasy elimiz egemendik alǵannan keıingi jyldary bastaldy. Sóıtip, jasyratyny joq, kerjalqaý, jan aýyrtpaı ońaı aqsha tapqysy keletin, urlyq-qarlyqtan da jıirkenbeıtin balalar kóbeıdi. Al mektepterdiń sen sabaq oqymasań da, kitap betin ashpasań da «úsh» qoıyp, synyptan synypqa ótkizip, qolyńa attestat ustatatynyn taǵy kórdi. Mundaı jaǵdaıda oqýshylarda qandaı bilim bolsyn?!
Oqýshy oqý-bilimniń nege qajet ekenin bastaýysh synyptan bastap zerdeleýi kerek. Sony alýǵa umtylýy kerek. Al bizdiń bilim berý júıemizde sol qajettilikti oqýshyǵa sezindirip, onyń qyzyǵýshylyǵyn oıatatyndaı yntalandyrý tetikteri bar ma? Bar deı almasaq kerek. Bizdińshe, búgingi oqý prosesin artqa tartyp otyrǵan, mine, osyndaı olqylyqtar jáne buǵan jaýapty vedomstvo tarapynan da úlgerimi tómen oqýshyny sol synypta qaıta qaldyrmaý kerek degen talaptyń qoıylýy der edim. Eń jamany, osynyń bári muǵalimder qaýymyn jastarǵa úlgi bolarlyq, eldiń, jerdiń qamyn oılaıtyn tulǵaly azamattan jasqanshaq, tym qarabaıyr tobyrǵa aınaldyryp bara jatyr.
Osyndaı problemalardy jedeldete sheshpeı, istiń toqyrap, «Baıaǵy jartas – sol jartas» qalpynda qala beretini anyq.
Berdaly RYSBEKOV,
zeınetker ustaz
Túrkistan oblysy,
Keles aýdany