Qorqyt ata atyndaǵy Qyzylorda ýnıversıtetiniń Stýdentter saraıynda Open spase fomatyndaǵy kitaphana ashyldy. Burynǵy kitaphanaǵa kúrdeli jóndeý jumystary júrgizilip, professor-oqytýshylar men bilim alýshylardy otandyq jáne sheteldik oqýlyqtarmen qamtamasyz etetin, jańa tehnologııamen jabdyqtalyp, túrli formattaǵy kezdesýler ótkizýge qolaıly orynǵa aınaldy.
Kitaphananyń ashylý saltanatynda Qorqyt ata atyndaǵy Qyzylorda ýnıversıtetiniń Basqarma tóraǵasy – rektor Beıbitkúl Kárimova rýhanı ortalyq stýdentterdiń sapaly bilim alýyna, tulǵalyq damýyna serpin beretinin atap ótti.
– Qaı zamanda da kitap qundylyǵy erekshe. Bul týraly Memleket basshysy Qasym-Jomart Toqaev «Búgingi zamanda kitapsyz, sondaı-aq kitaphanasyz adamnyń oıdaǵydaı damýy múmkin emes. Búkil álemdegi kitaphanalar – bilim men mádenıettiń oshaǵy, jańa oılar men tyń pikirlerdiń mekeni. Elektrondy formattyń qarqyndy damyp jatqanyna qaramastan dástúrli kitaphananyń aǵartýshylyq róli eshqashan mánin joǵaltpaıdy» degen bolatyn.
Qazir ýnıversıtettiń ǵylymı kitaphanasynda 2 mıllıonnan astam kitap bar. Jyl saıyn oqý prosesine qajetti kitaptar jańadan alynyp, oqýlyqtardyń sany artýda, dedi Beıbitkúl Sársemhanqyzy.
Oqý ornynda elektrondy kitaptar sany jyl sanap artyp keledi. Ýnıversıtettiń ǵylymı kitaphanasy AlemBook elektrondy kitaphanasymen 5 jylǵa kelisimshart jasasty. Osynyń arqasynda stýdentter kez kelgen ýaqytta ınternet arqyly AlemBook elektrondy kitaphanasynyń kitaptaryn tegin oqı alady. Respýblıkalyq joǵary oqý oryndary aralyq elektrondy kitaphana bazasyn paıdalaný merzimi 5 jylǵa uzartyldy.
Byltyrǵy oqý jylynda quny 38 mln teńgeden asatyn
5 710 oqý quraly satyp alyndy. Ýnıversıtet kitaphanalaryn sıfrlandyrý úshin joǵary jyldamdyqty Optima A2 skaneri satyp alynyp, ótken oqý jylynda 617 dana kitaptyń elektrondy nusqasy jasaldy.
Stýdentter saraıyndaǵy jańa kitaphanada arnaıy jabdyqtardan bólek 30 oryndyq konferens zal, 10 oryndyq kishi zal jáne stýdentter úshin 40 oryndyq jeke oryn bar.
QYZYLORDA