Er adam Kalashnıkov avtomatyn 3 mıllıon teńgege satpaq bolǵan. Bul mámileni qalalyq prokýratýranyń kelisimimen Uıymdasqan qylmysqa qarsy kúres basqarmasy toqtatty, dep habarlaıdy Egemen.kz Polisia.kz-ke silteme jasap.
– Arnaıy is-shara barysynda qarý-jaraq satýmen aınalysty degen kúdikpen 42 jastaǵy A. esimdi azamat ustaldy. Ol 5,6 mm patrondardy, atýǵa jaramdy AK-74 avtomatyn satty. Qarý-jaraqtyń nómiri joıylǵan, bul ony anyqtaýdy qıyndatý úshin ádeıi jasaldy dep oılaımyz. Qazirgi ýaqytta QR QK-niń 287-baby 4-bóligimen sotqa deıingi tergeýdiń biryńǵaı tizilimine tirkelgen qylmystyq is aıasynda sot-ballıstıkalyq saraptama taǵaıyndalyp, onyń qorytyndysy boıynsha atys qarýynyń qaıdan alynǵandyǵy jáne kimdiki ekendigi anyqtalatyn bolady, – dedi Uıymdasqan qylmysqa qarsy kúres basqarmasynyń basshysy Janat Nurǵalıev.
Kúdikti óz isin moıyndady. Ol ýaqytsha ustaý ızolıatoryna qamaldy.