Úndistannyń Tanushree Air Techniques kompanııasy Qazaqstanǵa saparmen kelip, «KAZAKH INVEST» UK» AQ basqarma tóraǵasy Meıirjan Iýsýpovpen kezdesti, dep habarlaıdy Egemen.kz.
Qaraǵandy oblysynda «Saran» ındýstrııalyq aımaǵy aýmaǵynda tolyq sıkldi hımııalyq-farmasevtıkalyq zaýyt salý jobasy talqylandy.
Jobany halyqaralyq GMP standarttaryna sáıkes júzege asyrý 170 jumys ornyn ashýǵa múmkindik beredi dep josparlanýda. О́nim ishki jáne jaqyn mańdaǵy naryqtarǵa jetkiziledi. Jobanyń quny 30 mıllıon dollardan asady.
Tanushree Air Techniques kompanııasynyń dırektory Apýrvasınh Chavada óz sózinde Qazaqstanda dári-dármek shyǵaratyn zaýyt ashý nıeti týraly aıtyp, sonymen qatar kompanııa óndiristi uıymdastyrýmen qatar, qazaqstandyq qyzmetkerlerdi joǵary tehnologııalyq jabdyqpen jumys isteýdi oqytýdy da óz moınyna alatynyna sendirdi.
«Bizde Úndistannyń farmasevtıkalyq ónerkásibinde 20 jyldyq tájirıbemiz bar, 140-tan astam jobany aıaqtadyq jáne álemniń kóptegen elderine ónim jetkizemiz. Qazaqstanda biz Ortalyq Azııa aımaǵyndaǵy óndiris tizbegin keńeıtý jobasyn júzege asyrýdy josparlap otyrmyz», dedi Apýrvasınh Chavada.
Ulttyq kompanııanyń basqarma tóraǵasy óz kezeginde, Úkimet tarapynan seriktesterdi ınvestısııalyq áleýet pen farmasevtıka salasyndaǵy sheteldik bıznesti qoldaý sharalary týraly habarlap, sondaı-aq KAZAKH INVEST qyzmeti týraly egjeı-tegjeıli aıtyp berdi.