Memleket basshysynyń «Egistikten sórege deıin» kooperasııalyq tizbegin damytýǵa qatysty bergen tapsyrmasyna sáıkes qolǵa alynǵan fermerlik bazardyń qurylysy márege jaqyn. Apta saıynǵy jármeńkeni almastyryp, sharýalardyń óz ónimderin tikeleı saýdalaýyna múmkindik týdyratyn bazar baǵany turaqtandyrýǵa úlken sep bolady dep kútilýde.
Pavlodar qalasynyń soltústik bóliginde júzege asyp jatqan fermerlik bazar qurylysy bastapqyda kúzdiń ekinshi aıynda daıyn bolady dep josparlanǵan. Alaıda shetelden jetkiziletin keıbir qural-jabdyqtardyń keshigýinen tapsyrý merzimi shegerildi. Onyń ústine jobanyń ózindik quny da bastapqyda 380 mln teńgege baǵalansa, keıinnen oǵan oblys bıýdjetinen jalpy somasy 839 mln teńge qarajat bólindi. Bul jerde satýshylar men satyp alýshylar úshin qolaıly jaǵdaılar qarastyrylady ári turaqtandyrý qoryna qajet saqtaý qoımalarynyń máselesi sheshilmek.
– Fermerlik bazardy qala jurtshylyǵy, ásirese zeınetkerler kútip qalǵanyn jaqsy túsinemiz. Negizi joba jospar boıynsha bıylǵy jeltoqsan aıynda tapsyrylýy kerek. Biz merziminen buryn aıaqtaǵymyz keldi. Sáıkesinshe qarasha aıynda tolyq iske qosylady dep josparlap otyrmyz. Qurylys-montajdaý jumystary aıaqtalyp qaldy, endi aýmaqty abattandyryp, ishki árleý jumystary jalǵasýda. Jańa bazarda óndirýshiler óz ónimderin tikeleı saýdalaıdy, saýda ústemeaqysy degen bolmaıdy. Nysan daıyn bolǵanda ol jerge shamamen 40-tan astam jergilikti óndirýshiler jiberiledi. Apta saıyn kádimgideı jármeńkeler uıymdastyrylyp, turǵyndar kótergeninshe azyq-túlik ónimderin satyp ala alady, – deıdi oblystyq kásipkerlik jáne ındýstrııalyq-ınnovasııalyq damý basqarmasy basshysynyń orynbasary Talǵat Doǵalov.
Bazar tańerteńnen keshke deıin jumys istemek. Et saýdasy úshin munda 16 oryn bólinse, qalǵanynda bakaleıa jáne ózge taýarlar satylady. Naryqta tanymal «Rýbıkom» jáne «Krendel» sekildi kompanııalarmen kelissóz júrgizilip jatqan kórinedi. Qazirdiń ózinde 15 satýshy munda saýda-sattyq júrgizýge nıet tanytqan.
– Bazardaǵy saýda pavılondaryn jaldaý quny arzan, sharshy metri úshin 2 myń teńge tóleıdi. Fermerlik bazar ashylǵan soń «Kvazar» saýda úıiniń janynda senbi saıyn uıymdastyrylyp kele jatqan aýylsharýashylyq ónimderiniń jármeńkesi tolyǵymen sonda kóshedi dep otyrmyz. Satýshylar jańa orynǵa ornalasady. Satyp alýshylar bazarǵa tramvaımen jáne avtobýspen jete alady. Jańadan marshrýttar uıymdastyrylady, – deıdi «Pavlodar» ÁKK» AQ basqarma tóraǵasynyń mindetin atqarýshy Bek Orazǵulov.
Bolashaq bazarda saýda oryndarynan bólek, ashana, kóshe saýdasyna arnalǵan qalqandar jáne júk kólikterine arnalǵan úlken turaq ashylady. Qajet bolsa, jalpy sany 240 saýda orny jasaqtalýy da múmkin. Mundaǵy ónim saqtaıtyn tońazytqyshtardyń aýqymdylyǵy da tańǵaldyryp otyr, shamamen 180 sharshy metr ónim bir mezette syıyp ketedi eken. Saýda ornynyń tazalyǵy men logıstıkasyna 12 qyzmetker jaýap beredi. Ár senbi saıyn munda 7-8 myń adam kelip saýda jasaıdy dep boljanýda.
PAVLODAR