Bıyl teatr hám kıno óneriniń jaryq juldyzy Sholpan Jandarbekovanyń týǵanyna – 100 jyl tolsa, kelesi jyly sol mejeni bizdiń jerlesimiz Bıken Rımova baǵyndyrmaq. Ult rýhanııatyna qomaqty olja salyp, sahna men ómirde birge jasasyp, telqońyr taǵdyr keshken qos sahna sańlaǵynyń mereıtoıyn Jetisý jurty sán-saltanatpen atap ótti.
Igilikti is-sharanyń betashary Bıken Rımova atyndaǵy Taldyqorǵan drama teatry ǵımaratynyń aldynda bastaý aldy. Kúre jolǵa deıin tóselgen qyzyl kilem ústimen qazaq kıno jáne teatr óneriniń tarlany, Qazaqstannyń halyq ártisi Tuńǵyshbaı Jamanqulov, Memlekettik syılyqtyń laýreaty, kórnekti aqyn, dramatýrg Iranbek (Iran-Ǵaıyp) Orazbaev, belgili dramatýrg Sultanáli Balǵabaev bastaǵan tulǵalar júrip ótti. Sonymen qatar is-sharaǵa kelgen halyq Bıken, Sholpan apalarymyzdyń urpaqtary men týystaryn, B.Rımova atyndaǵy Taldyqorǵan teatrynyń alǵashqy qarlyǵashtary men aǵa, orta, jas býyn ókilderin erekshe yqylaspen qarsy aldy.
О́nerdiń qara shańyraǵyndaǵy mýzeıdi kópshilik tamashalasa, Tuńǵyshbaı Jamanqulov, Iranbek Orazbaev, Halyqaralyq «Alash» ádebı syılyqtyń laýreaty Ámire Árin, teatr synshysy, M.Áýezov atyndaǵy Ádebıet jáne óner ınstıtýty teatr bóliminiń meńgerýshisi, ónertaný kandıdaty Amangeldi Muqan, kıno jáne teatr akteri Saǵyndyq Jumadil bastaǵan zııaly qaýym ókilderi baspasóz máslıhatyna qatysyp, qos tulǵanyń ómirinen syrly estelikter aıtty.
О́z kezeginde Tuńǵyshbaı Jamanqulov pen Iranbek Orazbaev 100 jyldyq mereıtoıǵa oraı basylyp shyqqan «Bıken Rımova» albomy men «Sholpan-juldyz» kitabynyń lentasyn qıdy.
Jýrnalıster qaýymyna telqońyr taǵdyr ıeleri týraly tebirene termelegen zııaly qaýym ókilderinen keıin Bıken Rımovanyń qyzy Merýert Qusaıynova sóz alyp, ǵazız júrekti anasy jaıly jyly esteligin jetkizdi. Sonymen qatar sahnadaǵy áriptesi Rahılıam Mashýrova Bıken apanyń «Qozy Kórpesh-Baıan sulý» qoıylymynda Baıan sulý obrazyn somdaǵanda taqqan belbeýin búginge deıin saqtap kelgenin, ózi de san qoıylymda kózindeı kórip taǵynǵanyn aıtyp, atalǵan jádigerdi óner oshaǵynyń mýzeıine tabys etti.
Dúbirli saltanat barysynda sahnaǵa kóterilgen oblys ákiminiń orynbasary Rýstam Álı sóz alyp, ǵumyrynda 200-den astam áıel obrazyn somdaǵan áıgili ártistiń ónegeli ómirin, shejireli ǵumyr-belesin aıshyqtaı kele:
«Bul toı búkil eldiń dúbirli dýmany. Sondyqtan aldaǵy jyly Bıken apamyzdyń toıyn erekshe atap ótemiz. Sonymen qatar abzal ana, alyp júrekti teatr maıtalmany Bıken Rımovanyń eńseli eskertkishin qalamyzda tuǵyryna qondyramyz», dep ónersúıer elge erekshe qýanyshty habardy jetkizdi.
Oblys basshysynyń orynbasary aıtqan qýanyshty lepesten keıin «Abaı» telearnasy daıyndaǵan B.Rımova týraly «Biregeı» derekti fılmi men Sh.Jandarbekova jaıynda syr shertetin beınefılm jurtshylyq nazaryna usynyldy.
Ǵasyrlyq ǵumyr ǵıbratyna shomǵan kórermen óz kezeginde Qazaqstannyń eńbek sińirgen ártisi Murat Ahmanovtyń rejısserligimen jańa baǵytta sahnalanǵan Bıken apamyzdyń «Qos muńlyq» dramasyn tamashalady.
Sóz aıaǵynda el aǵalary Bıken apamyzdyń qyzy Merýert Qusaıynova men «Qos muńlyq» dramasynda basty róldi (Kúnzıpa) somdaǵan Halyq ártisi Almahan Kenjebekovanyń ıyǵyna zerli kamzol japty.