Memleket basshysy «Jańa adamdar» jastar qozǵalysyn qurý týraly bastamany quptap, belsendi jas qazaqstandyqtarǵa árdaıym qoldaý kórsetetetin aıtty, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev memleketti túbegeıli jańǵyrtý jumystary júrgizilip, Ádiletti Qazaqstandy qurý jónindegi reformalar júzege asyrylyp jatqanyn aıtty.
– Qazaqstan azamattarynyń, ásirese jastardyń eńbekqorlyq qaǵıdatyn ustanýy mańyzdy. Syrttan kómek kútýdiń qajeti joq. Qazir zaman basqa, ıaǵnı mańyzdy sheshimderdiń ýaqyty, serpilis jasaıtyn sát. Jastar bolmasa, munymen kim aınalysady? Qazir Ilon Masktyń tájirıbesi men ómirlik ustanymyn úlgi etý úrdiske aınaldy. Iá, ol otbasymen birge shalǵaı provınsııadan Amerıka Qurama Shtattaryna keldi. О́ziniń kreatıvtiliginiń, batyldyǵynyń, ózine tán ereksheliginiń arqasynda «Ilon Mask fenomenin» qalyptastyra aldy. Mundaı mysaldar óte kóp. Jaqynda Men Nıý-Iorkte Amerıkanyń joǵary oqý oryndaryn bitirip, amerıkalyq kompanııalarǵa jumysqa ornalasqan jastarymyzben kezdestim. Men olarǵa: «Biz sizderdi Qazaqstan azamattary dep bilemiz. Sizder – qazaqsyzdar. Nıý-Iork nemese Eýropa elderi bolsyn, álemniń damýshy elderi bolsyn, qaı jerde jumys isteseńiz de, qazaq bolyp qalasyzdar» dep aıttym, – dedi Memleket basshysy.
Prezıdent jastar ókilderin tolerantty, damyǵan qoǵamdy birge qurýǵa shaqyrdy. Memleket basshysynyń pikirinshe, jastar ózin-ózi udaıy jetildirip, jan-jaqty damytyp, til úırenýi qajet.
Memleket basshysy jaýapkershilik máselesin de qozǵady. Prezıdenttiń aıtýynsha, tek jaýapkershiligi bar azamattar ǵana óziniń memleketi úshin mindetteme ala alady.
– Abaı kezinde «tolyq adam» degen tereń uǵymdy engizdi. Abaı zamanynan oza týdy. Ol «tolyq adam» týraly bilim, túsinik, qoǵamnyń qajettiligi turǵysynan aıtty. Qazir aǵylshynsha aıtylyp júrgen «a person of integrity», ıaǵnı barlyq qarym-qabileti men bilimi toǵysqan adam degenimiz osy. Sondyqtan biz bárimiz «tolyq adam», jaýapty azamat bolýǵa tyrysýymyz kerek. Shyn máninde, biz qoǵamymyzda tártip pen zań ústemdigi kýltin ornatýǵa umtylýymyz kerek. Meniń mindetim – elimizdiń zańdary ádil bolǵanyn, adamdardyń ol zańdarǵa senýin qamtamasyz etý. Osy zań aıasynda qoǵamymyzda tártip bolýyn talap etemiz, – dep málimdedi Prezıdent.
Qasym-Jomart Toqaevtyń pikirinshe, jastar elimizdiń qoǵamdyq ómirine belsendi túrde aralasyp, óz ustanymyna berik bolyp, túrli ıdeıalar usynyp, olardy iske asyrýǵa atsalysqany jón.
– Belsendi azamattyq áreket arqyly sizder, birinshiden, memleketke paıda ákelesizder, ekinshiden, ózderińizdi tanyta alasyzdar. Qalaı bolǵanda da, biz mamandar irikteletin, sáıkesinshe ýaqyt óte kele memleketti basqarý jaýapkershiligin arqalaı alatyn óte qabiletti adamdar shyǵatyn ashyq qoǵamǵa qaraı qadam basyp kelemiz. Sizderdiń aralaryńyzda keleshekte depýtat nemese mınıstr bolatyn, tipti memleketimizdiń prezıdenti bolatyn azamattar otyr dep oılaımyn, – dedi Memleket basshysy.
Prezıdent sóz sońynda «Jańa adamdar» jastar uıymyna tabys tiledi.
– Bizdiń kórnekti aqynymyz Maǵjan Jumabaevtyń «Men jastarǵa senemin» degen sózi bar. Shyn máninde, men de jastarǵa senemin. Barshańyzdy qoldaımyn. Rasynda, bizdiń elimizge sizder sııaqty belsendi, bilimdi, kózi ashyq, kókiregi oıaý jastar kerek. Elimizdiń bolashaǵy jastardyń qolynda, – dedi Qasym-Jomart Toqaev.
Sonymen qatar sharada qozǵalys jetekshileri men belsendileri Ásel Bádenova, Eldana Kádenova, Rızabek Rashıt, Kúnnur Bolatbek jáne Dılnaz Qapezova sóz sóıledi.