ASTANA. 30 mamyr. Reseı Memlekettik dýmasynyń spıkeri Sergeı Naryshkın Eýrazııalyq ekonomıkalyq odaqtyń postkeńestik kezeń tarıhyndaǵy úlken bir betburysty qadam bolyp tabylatynyn aıtty. Bul týraly RIA «Novostı» habarlady. Budan buryn málim etilgendeı, Reseı, Belarýs jáne Qazaqstan memleketteriniń Prezıdentteri keshe, beısenbi kúni Astanada 2015 jyldyń 1 qańtarynan bastap iske kirisetin EAEO (Eýrazııalyq ekonomıkalyq odaq) qurý jónindegi kelisimge qol qoıdy. Osylaısha, 170 mıllıon adamy bar TMD keńistiginde damýdyń jańa qýatty ekonomıkalyq ortalyǵyna aınalatyn asa iri jalpy naryq qalyptastyrý aıaqtalyp keledi.
«Astanada Eýrazııalyq ekonomıkalyq odaq qurý jónindegi kelisimge qol qoıylýyn eshbir asyryp aıtpaı-aq onyń postkeńestik kezeń tarıhyndaǵy eń bir sheshýshi qadam bolyp otyrǵanyn atap ótýge bolady. Qazaqstan Prezıdenti Nursultan Nazarbaevtyń bul ıdeıasy arada 20 jyl ótkende naqtyly quqyqtyq pishinge engeli tur», - dedi Naryshkın jýrnalısterge.
«Álem rynogynda qalyptasyp otyrǵan kúrdeli ahýaldy eskere kelgende, atalmysh sheshimniń Eýrazııalyq ekonomıkalyq odaq elderiniń damı túsýlerine jańa múmkindikter alyp beretinine senimdimin», - dep atap ótti ol.
Memlekettik dýmanyń tóraǵasy sonymen birge óz kezeginde úsh el parlamentiniń Keden odaǵy men Birtutas ekonomıkalyq keńistik sheńberindegi zańnamalardyń úılesimdi jumys jasaýlaryna aıtarlyqtaı úles qosqandaryn da aıtyp ótti. «Bul jumystar, sóz joq, jalǵasyn tabatyn bolady», - dedi spıker sońynda.
Murat Aıtqoja.
Derekkóz: RIA «Novostı».
Foto: RIA «Novostı». Mıhaıl Klımentev.