Memleket basshysy Qasym-Jomart Toqaev Fransııaǵa jasaǵan resmı sapary aıasynda Fransııa Respýblıkasynyń Senatyna bardy, dep habarlaıdy Egemen.kz Aqordanyń resmı saıtyna silteme jasap.
Prezıdent Qasym-Jomart Toqaevty Senat ǵımaratynyń aýlasynda Jerar Larshe ózi qarsy aldy. Sodan keıin Memleket basshysy men Senat spıkeri sap túzep turǵan Qurmet qaraýylynyń aldymen júrip ótti.
Kezdesý barysynda Qasym-Jomart Toqaev Parıjge jasaǵan resmı sapary aıasynda qol jetkizilgen ýaǵdalastyqtar eki el arasyndaǵy kópjaqty yntymaqtastyqqa tyń serpin beretinine senim bildirdi.
Memleket basshysynyń aıtýynsha, Emmanıýel Makronmen júrgizilgen kelissóz Qazaqstan men Fransııa arasyndaǵy seriktestiktiń strategııalyq sıpatyn rastady. Saýda-ekonomıkalyq yntymaqtastyqty damytýǵa, energetıka jáne kólik-logıstıka salalaryna ınvestısııa tartý máselesine erekshe nazar aýdaryldy.
Prezıdent eki memleket arasyndaǵy parlamentaralyq baılanystardy nyǵaıtýdyń mańyzdylyǵyn atap ótti. Osyǵan baılanysty Qasym-Jomart Toqaev Senat spıkerin Qazaqstanǵa saparmen kelýge shaqyrdy.
Jerar Larshe elimizde júrgizilip jatqan saıası jáne ekonomıkalyq reformalardy joǵary baǵalady. Ol Qazaqstan men Fransııa arasyndaǵy yntymaqtastyqty damytý úshin ózara belsendi is-áreket júrgizýge daıyn ekenin jetkizdi.
Kezdesý sońynda Prezıdent Fransııa Senatynyń Qurmetti qonaqtar kitabyna estelik qoltańba qaldyrdy.