Elimizdegi alǵashqy Shekshekata fermasy

Munaıly óńirdiń Mahambet aýdanynda ótken jyldan beri eshki fermasy jumys jasaı bas­tady. «AtyraýAgroО́nimderi» sharýa qojalyǵynyń jetekshisi Vladımır Rozmetovtiń aıtýynsha, fermada jylyna 180 tonna eshki súti óndirilip, 140 tonna eshki sútiniń ónimi shyǵarylady dep josparlanyp otyr. Atalǵan fermaǵa  byltyr Gollandııadan «Zalınskaıa» atalatyn asyl tuqymdy 150 eshki ákelingen. Sheteldik eshkiler jergilikti aýa raıyna tez beıimdelipti. Bıylǵy kóktemde sheteldik eshkilerden alǵashqy tól alyndy. Mamyr aıyna deıin 150 eshki tóldegen.   Alynǵan tóldiń ishinde 50-ge jýyq egiz laq bar. Bolashaqta fermadaǵy eshki sanyn kóbeıtý kózdelip otyr. Taıaýda fermaǵa Serbııadan 300 eshkini  ákelý josparlanýda. Mundaǵy maqsat – elde  em úshin taptyrmaıtyn eshki sútin óndirý. Sóıtip, óńir tur­ǵyn­daryna eshki sútinen alyn­ǵan qaımaq pen  súzbe, tipti, sheteldik jeńsik as sanalatyn balqytylǵan irimshiktiń 4 túri endi atyraýlyqtar úshin alys­tan emes, irgedegi aýyldan tabylatyn boldy. Qazirdiń ózinde osy zamanǵy ozyq tehnologııany meńgergen eshki sharýashylyǵynyń mamandary tutynýshylarǵa 7 túrli taǵam usynyp otyr. Jáne ol ónimderge jergilikti naryqta úlken suranystyń barlyǵy baıqalýda. Jalpy quny 600 mıllıon teńgeni quraǵan bul joba memleket qoldaýymen júzege asyrylýda. Onyń 50 paıyzyn kásipker Vladımır Rozmetov óz esebinen salypty. Ámbebap keshende sút óndirýden bastap ony óńdeý úderisi tolyqtaı avtomattandyrylǵan. Aýyl sharýashylyǵy salasyndaǵy ıtalıandyq eń ozyq tehno­­lo­gııaǵa negizdelgen keshen­de  40 túrli ónim shyǵarý josparlanǵan. «Mem­leket tarapynan jasalyp jatqan túrli jeńildikter aýyl sharýashylyǵyn órkendetemin degenderge taptyrmaıtyn múmkindik», deıdi kásip ıesi V.Rozmetov. Kásibin násibim dep uǵynǵan kásipker daıyn ónimdi jergilikti saýda oryndaryna usyna bas­tady. Atyraý qalasyndaǵy «Dına» saýda ortalyǵyndaǵy saýda núktesinde eshki sútine suranystyń artyp otyrǵanyna kýá boldyq. Eshki sútin tuty­ný­shylardyń biri Kámshat Aq­berdıeva jeti aılyq balasyna eshki sútin paıdalana bastapty. «Eshki sútiniń quramynda, ásirese, jas náreste úshin dárýmen kóp. Sol sebepten turaqty paıdalanýdy kózdep otyrmyn» deıdi ol.  Keleshekte óndiris kólemin ulǵaıtýdy jos­parlap otyr. Eshki sútine qyzyǵýshylyǵy oıanǵan jáne bir tutynýshy Nurjan Aqqalıev ta «Eshki sútinde ana sútin almastyratyndaı dárýmen mol ekenin úlkenderden estıtin edik. Jalpy, eshki sútiniń adamnyń aǵzasyna oń áser etetin emdik qasıeti bar», deıdi. Onyń pikirinshe, buryn saýda oryndarynan reseılik eshki sútin alyp júrgen. Endi mine, otandyq ónim­niń kóńilge qonymdy baǵa­men satylǵany tutynýshy úshin tıimdi bolyp otyr. Sharýashylyqqa Mahambet aýdanynyń turǵyndary jumys­qa tartylypty. Máselen, Jan­geldi Toqov eshki fermasy ashylǵannan beri jumys jasaıdy. Alǵashynda shetelden ákelingen eshkilerdiń jergilikti jerge beıimdelýin qadaǵalady. Eshkilerdiń jemshóbi men sýynyń merziminde berilýin de, jaraqat almaýyn da  qadaǵalap júrdi. Munda Jan­geldimen birge, buryn kitap­hanashylyqtan tabys tap­qan zaıyby Gúlbarshyn da jumysqa ornalasypty. Sonan soń uly Erkebulan munaıshy mamandyǵyn meńgergenine qara­mastan ata-anasyna qolǵa­bys jasaý úshin eshki fermasyna jumysqa kelipti. Jangeldi Toqovtyń otbasy buryn alystaǵy Qyzylqoǵa aýdanynda turǵan eken. Qazir onyń  otbasyna sharýashylyq basshylary Saraıshyq aýylynan úı alyp beripti. «Maman­­dyǵymnyń ózgergenine ókin­beımin. Eń bastysy, otaǵa­sym men ulym qasymda. Bári­miz­diń de jumysymyz bar», deıdi Gúlbarshyn.  Anasynyń aıtqanyn uly Erkebulan da qostaıdy. – Qaı kezde de jumyssyz júrý adamnyń kóńil-kúıine, minezine teris áser etedi. Erteńgi kúnge degen senimsizdik paıda bolady, –deıdi bir kezderi jumyssyz júrgen Jangeldi Toqov. – Al qazir turaqty jumysymyz bar.  Ozyq úlgidegi tehnologııamen jabdyqtalǵan fermanyń keleshegine senimimiz mol. Buǵan Elbasy Nursultan Nazarbaevtyń aýyldardy qol­daýynyń arqasynda qol jet­kizip otyrmyz. Bizdiń kóńilge qonymdy jalaqymyz bar, bas­panamen de qamtamasyz etti. Qarapaıym eńbek adamy úshin budan artyq ne kerek? Vladımır Rozmetov je­tek­­shilik etetin «Aty­raýAg­roО́nim­deri» sharýa qojalyǵyn kópsalaly deýge bolady. Munda kókónis­ter de, alma men shıe de ósiriledi. Toǵandarda balyq ta ósiriledi. Tabyn-tabyn sıyr men otar-otar qoı óristi toltyrdy. Osyndaı san alýan sharýany iske asyrýǵa óńirdiń 300-den astam turǵynyn jumysqa tartqan Vladımır Rozmetov «Bolashaqta taýarly-sút keshenin, qus fabrıkasy men taýarly-bekire fermasyn iske qosýdy oılastyryp júrmin», deıdi. Aıtpaqshy, sharýasyna myǵym kásipker jaqynda eshki súti men alýan túrli ónimderin Máskeýdiń saýda oryndaryna shyǵarý úshin kelisim jasady. Joldasbek ShО́PEǴUL, «Egemen Qazaqstan». Atyraý oblysy, Mahambet aýdany.