Jambyldyq sharýalar aǵyn sýdyń azabyn jazda ǵana emes, qys mezgilinde de qozǵap júr. Munysy ózekti másele óte tez sheshilse degen nıetten bolsa kerek. Sarysý aýdanynyń sharýalary bul joly óńirge salaǵa jaýapty mınıstrlerdi shaqyrdy. Jergilikti halyqtyń janaıqaıyn estıtin adam bar ma eken?
Dosbol men Túgisken aýyldary turǵyndarynyń aıtýynsha, eldi mekender tabıǵı apattyń aldynda tur. Al atqaminerler jurttyń janaıqaıyna alty jyldan beri qulaq aspaı keledi. Qamyqqan halyq osylaısha jazdyń qamyn qysta oılap otyr. О́tkir máseleniń ońynan sheshilgenin qalaıdy. О́ıtkeni halyq bul máseleni kótere-kótere mezi bolǵan.
«Aýyl jurty aǵyn sýdyń azabyn tartýdaı tartyp keledi. Sonyń saldarynan shóp te shyqpaı qalǵan. Tórt túlik mal osylaısha azyqtan qaǵylyp otyr. Sondyqtan da bul máseleniń der kezinde sheshimin tapqany maqul bolmaq», deıdi Dosbol aýylynyń turǵyny Pernebek Altynbekov ashynyp.
Eldi meken turǵyndary Aýyl sharýashylyǵy jáne Ekologııa mınıstrleriniń aýdanǵa arnaıy at basyn buryp, jaǵdaımen tolyq tanysqanyn qalaıdy. Sol úshin de salaǵa jaýapty vedomstvo basshylaryn aýyldaryna shaqyryp otyr. Mınıstrler kelse, másele ózdiginen sheshimin tabardaı úmitteri basym.
Sarysý aýdanynyń sartap dalasyn qonys etken jurtshylyq tórt túlik maldyń qyrylýynan ábden sharshaǵan, mezi bolǵan. Sýdyń tapshylyǵynan birneshe aýyldyq okrýgte jaıylym jerler jaramsyz bolyp qalǵan kórinedi. Saldarynan dıqandar egin salýdan, shopandar shóp shabýdan qaǵylǵan eken. Qysqasy, aýdandaǵy birneshe eldi mekenniń ahýaly dabyl qaǵarlyqtaı-aq bolyp tur.
«Birneshe jyldyń bederinde 300-400-ge jýyq iri qara mal shyǵyn boldy. Sebebi málim ǵoı. Sýdyń joqtyǵy maldyń toqtyǵyna tikeleı áser etip turǵany túsinikti. Tirshilik nári bolmaǵannan keıin mal ataýlyda neshe túrli aýrý tirkelýi yqtımal ekenin qaperden shyǵarmaǵan abzal. Tipti tórt túlik parazıt aýrýynan óleksege aınalýy da múmkin. Qysqasy, máselemiz tezirek sheshimin tapqany durys», deıdi Dosbol aýylynyń turǵyny Talǵat Mahanov.
Aǵyn sýǵa sýsaǵan sarysýlyq sharýalar kórshi Talas aýdanyna kiriptar bolyp otyrǵandaryna kúıinedi. Atalǵan aýdannyń atqaminerleri aǵyn sý ózderine jetpeı jatqandyqtan, kórshilerine óte az mólsherde jiberip otyr eken. Osylaısha, kórshiniń qabaǵyn baqqan sharýalardyń júzinen yzanyń taby aıqyn ańǵarylyp tur.
Aýdandaǵy jergilikti atqarýshy bıliktiń ókilderi birneshe aýyldyq okrýgte tórt túlik mal qyryldy degendi joqqa shyǵaryp otyr. Áıtkenmen aǵyn sý máselesiniń ótkir ekenin biledi. Aıtýlarynsha, sý jetkizýde máselesi ótkir bolyp turǵan Nurabaı kanalyn keńeıtý jumystary aldaǵy jyly qolǵa alynbaq. Soǵan qaraǵanda sharýalardyń janaıqaıy jaqyn birneshe aıdyń bederinde sheshimin taba qoıýy ekitalaı sııaqty. Kim bilsin, jaýapty mınıstrler kelip, iske jedel kirisse, bálkim jergilikti jurtshylyqtyń alǵysyn arqalap ta qalar.
«Anyǵyraq aıtar bolsaq, Talas ózeni boıyndaǵy Oıyq sý torabynan keıingi ornalasqan sý rettegish quraldardy Sarysý aýdanyna deıingi aralyqta «QazSýShar» respýblıkalyq memlekettik kásiporynynyń Jambyl fılıaly teńgerimine berý boıynsha qujattar daıyndalyp jatyr. Osy baǵytta jumystar júrgizilmek», dedi Sarysý aýdany ákiminiń orynbasary Qaırat Amanov máseleniń mánisine úńilip.
Saly sýǵa ketken sarysýlyqtar bolsyn, basqa aýdannyń sharýalary bolsyn, qysy-jazy aǵyn sýdyń máselesin kóterýden sharshaǵan emes.
BAQ ókilderin jıi shaqyryp, kókeıkesti máselelerin kóterip jatady. О́tkir problemalar BAQ betterinde qozǵalýdaı qozǵalyp keledi. Alaıda óńirde bul másele órshı túspese, basylatyn túri joq. Sarysýlyqtardyń máselesin jedel sheshýge kimniń quzyreti men qaýqary jetedi eken? Kim bilsin... Bárin ýaqyt kórsete jatar...
Jambyl oblysy,
Sarysý aýdany