Pravoslavıe shirkeýlerinde 19 qańtarǵa qaraǵan túni kreshenıe is-sharasy atap ótiledi. Elordada mundaı is-sharaǵa qatysqysy keletinder úshin arnaıy jabdyqtalǵan oryndar daıyndaldy. Elordanyń júzdegen turǵyndary men qonaqtary jappaı shomylý oryndaryna jınaldy, dep habarlaıdy Egemen.kz qala ákimdiginiń resmı saıtyna silteme jasap.
Sý qoımalarynda pravoslavıe baǵytyn ustanatyndar kreshenıe rásiminen ótti. Elordada osyǵan baılanysty birneshe oryn anyqtaldy.
Arnaıy jasalǵan oıyqtar Esil ózeniniń oń jaǵalaýynda, M.О́temisov atyndaǵy Oqýshylar saraıy, «Grand Alataý» turǵyn úı kesheni mańynda jáne Jaǵalaý aýdanynda jasalǵan.
Bul is-shara astanalyqtar arasynda óte tanymal. Olar muzdy oıyqqa túser aldynda halat pen sýǵa túsetin kıimin kııý úshin arnaıy ornatylǵan shatyrlardyń janyna jınaldy.
Sý aıdyndarynyń janynda polısııa qyzmetkerleri, elordalyq Tótenshe jaǵdaılar departamentiniń qyzmetkerleri jáne jedel járdem brıgadasy kezekshilik etti. Olardyń aıtýynsha, úsik shalý men jaraqattanýdy boldyrmaý úshin jabdyqtalmaǵan jáne belgilenbegen oryndarda sýǵa túspegen jón.
Elordalyq TJD qyzmetkerleri qaýipsiz kúıde sýǵa túsip shyǵý úshin aǵashtan jasalǵan baspaldaq ornatylǵanyn túsindirdi. Olar aıazdy kúnderi kreshenıe is-sharasynan ótetin jurtqa aǵash tutqalardy ustap, baspaldaqtan alystamaý kerektigin eskertti.
Kreshenıe ótetin oıyqtyń mańy arnaıy jabdyqtarmen jáne kıinýge arnalǵan oryndarmen jabdyqtalǵan. Qajet bolǵan jaǵdaıda qutqarýshylar men dárigerler sýǵa túskenderdi jylytý pýnkterine ornalastyrýǵa jáne medısınalyq kómek kórsetýge daıyn.
Is-sharaǵa túrli jastaǵy adamdar otbasylarymen qatysty. Olar muzdy sýǵa túskenin bylaısha túsindirip berdi.
«Kreshenıe is-sharasyna ekinshi ret qatysyp turmyn. Sýyq sý densaýlyqqa óte paıdaly. Bastapqyda tynysyń tarylyp, tońyp ketkenińmen kóp uzamaı deneńe jylý barady», dedi elorda turǵyny Aleksandr Katkov.
Esterińizge sala keteıik, kreshenıe is-sharasy 19 qańtar kúni tańǵy 08:00-den 20 qańtar kúni saǵat 02:00-ge deıin jalǵasady.