Astana qalasy Qoǵamdyq densaýlyq saqtaý basqarmasy senator Gúlmıra Kárimovanyń ólimine qatysty sot-medısınalyq saraptamanyń aldyn ala qorytyndysyn jarııalady, dep habarlaıdy Egemen.kz.
«Sot-saraptamalyq zertteýdiń aldyn-ala nátıjeleri boıynsha naýqas óliminiń tikeleı sebebi - jedel mıokard ınfarktisi. Anafılaktıkalyq shok yqtımaldylyǵy týraly kúdik rastalmady. Sondaı-aq jedel járdem brıgadasy oqıǵa ornyna der kezinde, 5 mınýtta jetken. Brıgada oqıǵa ornyna jetkende, ókinishke qaraı, naýqastyń tamyr soǵysy bilinbegen, tynysy bolmaǵan. Soǵan qaramastan, reanımasııalyq is-sharalar ótkizildi. Biraq odan nátıje bolmady. Marqumnyń týǵandary men jaqyndaryna shyn júrekten kóńil aıtamyz», delingen qalalyq Qoǵamdyq densaýlyq saqtaý basqarmasynyń Instagram paraqshasyndaǵy jazbasynda.
Eske sala keteıik, keshe 45 jastaǵy Senat depýtaty Gúlmıra Kárimovanyń kenetten qaıtys bolǵanyn habarlaǵan edik.