Qazaqstan Halyq partııasynan Parlament Májilisine kandıdattar Ashat Asylbekov, Elmıra Áýezova, Nursultan Shoqanov Almaty qalasyndaǵy №40 jáne №145 orta mektepterde ata-analarmen kezdesip, saılaýaldy úgit-nasıhat jumysyn júrgizdi.
Spıkerler saılaýshylardy partııanyń saılaýaldy baǵdarlamasymen tanystyrdy.
– Bizdiń partııa «Artsport» qozǵalysyn qoldady. Nátıjesinde, júzdegen myń bala sport seksııalary men shyǵarmashylyq úıirmelerge tegin qatysty. Balalar meıirim men qamqorlyqty qazirden bastap sezinip ósýi kerek. Biz balalarymyzdyń sportpen jáne shyǵarmashylyqpen tegin aınalysqanyn qoldaımyz, – dedi Ashat Asylbekov.
Kezdesýde partııa ókilderi halyqty tegin turǵyn úımen qamtamasyz etý qajettigine de nazar aýdardy. «Elimizdegi kedeıshilikti joıý qajet. Memleket halyqty turaqty jumyspen qamtý, áleýmettik salalardaǵy problemalardy retteýi kerek», dedi Elmıra Áýezova.
Spıkerler halyqtyń qaryzǵa batqanyn, onlaın nesıeniń saldarynan elimizde alaıaqtardyń qaptap ketkenin, jastardyń qumar oıynnyń qurbanyna aınalyp bara jatqanyn da alǵa tartty.
«Qazir onlaın nesıeniń jarnamasy qaptap ketti. Halyq májbúrlikten nesıe alyp, qaryzǵa batyp otyr. Alaıaq kompanııalar eldi qanap jatyr. Osylardy memleket aýyzdyqtaýy kerek», dedi Nursultan Shoqanov.
Qazaqstan Halyq partııasynyń ókilderi memlekettik mekemelerde (arnaýly orta jáne joǵary) bilim berý men densaýlyq saqtaý mamandaryn tegin oqytý, áıelderdiń zeınetke shyǵý jasyn 58-ge bekitý, al 4 jáne odan kóp bala tárbıelep otyrǵan analardy 55 jasqa deıin zeınetke shyǵarý usynysyn qoldaıtynyn, bul baǵytta júıeli jumystardy jalǵastyra beretinin aıtty. Kandıdattar saılaýaldy baǵdarlamada bankterge azamattardyń artyq tólemderin qaıtaryp berý týraly talap qoıǵandaryn málimdedi.
Al Astana qalasynda Qazaqstan Halyq partııasy saılaýaldy úgit-nasıhat jumysy aıasynda avtosherý ótkizdi. Basty maqsat – jol-kólik oqıǵalarynyń aldyn alý.