Qazaqstan Halyq partııasynyń tóraǵasy, Parlament Májilisi depýtattyǵyna kandıdat Ermuhamet Ertisbaev pen partııa músheleri Irına Smırnova, Asylbek Nuralın О́skemendegi GES pen oblystyq polısııa departamentine qarasty emhana ujymymen kezdesti.
Spıkerler partııanyń saılaýaldy baǵdarlamasynyń basym baǵyttaryn da túsindirip ótti. «Biz klandyq-olıgarhııalyq kapıtalızm júıesine qarsymyz. Biz sosıalızmdi qoldaımyz. Baı azamattar – baı memleket, myqtylarǵa – jumys, muqtajdarǵa qamqorlyq qajet», dedi E.Ertisbaev.
Kezdesý barysynda partııa tóraǵasy jer jáne jer qoınaýy halyqqa tıesili bolý kerek ekenin erekshe atap ótti.
– Biz elimizdiń árbir azamatyna ulttyq baılyqty qaıtarý tetigin iske qosýǵa qol jetkizýimiz kerek. Májilis qoǵamdyq múddeni bildiretin barlyq oqıǵaǵa parlamenttik tergeý júrgizý quqyǵyna ıe bolýǵa tıis. Osylaısha, biz halyqtyń obektıvti aqparat alý quqyǵyn qamtamasyz etemiz. Respýblıkalyq bıýdjettiń atqarylýyn tekserý ókilettigi bar Aýdıtorlyq palata Májilis quramyna kirýge tıis. Baqylaý fýnksııasy senimdi aqparatty qalpyna keltirý úshin qajet. Sebebi úkimettiń qazirgi esep berý tásili syrǵytpa jaýap tárizdes, – dedi ol.
Partııa tóraǵasynan soń sóz alǵan spıkerler aýyldyq okrýg ákimderin irikteý krıterıılerine qatysty jergilikti ózin ózi basqarý týraly zańdy ózgertýdi talap etetinderin aıtty. Olardyń pikirinshe, barlyq deńgeıdegi ákimdi tikeleı daýys berý arqyly halyq saılaýy kerek. Ákim mindetin durys atqara almaǵan jaǵdaıda halyq ony keri qaıtarýǵa tıis.
Spıkerler kásiporyndy zańsyz jekeshelendirý nemese ózge de quqyqtyq jáne salyqtyq zań buzýshylyqtar anyqtalǵan jaǵdaıda onyń kúshin joıyp, ınvestor men memlekettiń mindettemelerin qaıta esepteý qajet ekenin alǵa tartty.
– Monopolııalar resýrstardy rásýalap, ómirdiń barlyq salalaryndaǵy sybaılas jemqorlyq mıllıondaǵan qarapaıym adamnyń bolashaǵyna balta shaýyp otyr. Eń tómengi jalaqy mólsherin 140 myń teńgege deıin jetkizý qajet, – deıdi Asylbek Nuralın.