Jumyssyzdyqty joıý joldary

Kandıdat ujymǵa Halyq partııasynyń saılaýaldy baǵdarlamasyn tanystyrdy. Partııa «Jer men jer qoınaýy halyqqa tıesili» degen usynysqa bastamashy bolyp, bul túzetý Konstıtýsııaǵa engizildi. Halyq partııasy – Ha­lyqtyq kapıtalızmdi qoldaıdy. Bul qýatty orta tap qurý jáne bılik pen baılyq halyqqa tıesili qoǵam qurý degendi bildiredi.

Kezdesýde áleýmettik saladaǵy máseleler aıtyldy. «Biz medısına men bilim salasynyń halyqqa qoljetimdi jáne tegin bolǵanyn talap etemiz. Búginde eń ózekti másele – jastardyń baspanaǵa qol jetkize almaı otyrǵany. Halyq partııasy osy rette bul sanattaǵylar úshin arnaıy baǵdarlama qurýdy usynyp otyr. Bul qoǵamdaǵy shıelenisti azaıtady», dedi A.Mı­lıýtın.

Al partııanyń saılaýaldy úgit-nasıhat toby «QazExpoCongress» kompanııasynyń ujymymen kezdesti. Onda Parlament Májilisi depýtattyǵyna kandıdat, QHP Astana fılıalynyń tóraǵasy Nurdáýlet Orazhanov partııanyń saılaýaldy baǵdarlamasyn tanystyrdy.

Kandıdat turǵyndardyń basty problemasy bolǵan turǵyn úı máselesi týraly tilge tıek etti. Qazirgi tańda turǵyn úıge qol jetkizý halyqtyń armany. Osy oraıda N.Orazhanov Halyq partııasy osy máseleni sheshýdiń tıimdi jolyn usynyp otyrǵanyn atap ótti.

– Bizdiń partııa aýyl turǵyndaryna ıpotekany sýbsıdııalaýdy usynyp otyr,– dedi ol. – Qurylystyń negizgi tiregi– jastar. Aýyldardy damytýdyń negizgi baǵyty retinde eldi mekenderdiń ınfraqurylymyn qalpyna keltirý qajet. Sondaı-aq partııa ókili aýyldardy jandandyryp, qurylysty qarqyndy damytsa, elimizdegi jumyssyzdyq tómendeıdi degen pikirde. Bul jastardyń aýyldan ketýine tejeý bolady. Qazir kedeıshilik shkalasy qyzyl syzyqqa taıaý. Jastar arasynda jumyssyzdyq joıylmaı keledi. Bári aýyl­dy tastap, qalaǵa umytylady. Kóptegen adam bul problemanyń túıini tarqamaıdy degen oıda. Al biz bul tuıyqtan shyǵýdyń naqty sheshimin usynamyz. Halyq partııasy turǵyn úı quqyǵy – árbir azamattyń ajyramas quqyǵy dep sanaıdy,– dedi N.Orazhanov.