Múmkindigi shekteýlilerdi qoldaıdy

Kezdesý beıresmı túrde ótti, partııa múshelerine kez kelgen adamnyń suraq qoıýyna múmkindik berildi. Máselen, Pavlodar qalasy turǵyndarynyń biri ekologııa taqyrybyna qatysty saýal qoıdy.

«Biz partııa qyzmetkerleriniń qaǵazdardy, paraqshalardy taratyp, plakattar men bılbordtardy qalaı ilip jatqanyn kórip júrmiz. Ony basyp shyǵarý úshin qansha qaǵaz jumsaldy, qansha aǵash joıyldy? Qansha óndirilgen ottegini joǵaltamyz? Tabıǵatqa keltirilgen zalaldy qalaı óteısizder?», dedi ol.

Onyń saýalyna partııa tóraǵasy Aıdarbek Qojanazarov: «Bizdiń partııa ekologııaǵa baıyppen qaraıdy, biz de sizdeı jaǵdaıdy bastan keshirip jatyrmyz. Degenmen biz tek saılaý kezinde nemese odan keıin ǵana emes, tabıǵatqa árdaıym qamqor­lyq tanytatynymyzdy basa aıtqym keledi», dep ja­ýap berdi.

Partııalyqtarǵa qoıylǵan taǵy bir saýal múmkindigi shekteýli jandardyń jaǵdaıyna qatysty boldy.

«Mysaly, aıaq-qolynan aıyrylǵan adamdar jyl saıyn múgedektigin rastaýǵa májbúr. Ár joly komıssııa aldyna baryp, qoldary men aıaqtary joq ekenin dáleldeıdi. Pavlodar – syrqat deńgeıi joǵary óńir, qalada «hımııamen» tynys­taımyz. Nelikten biz basqa máselelermen qatar, aýrý ekenimizdi dáleldeýimiz kerek? Bul másele qashan sheshimin tabady?», dep surady jıynǵa kelgen qala turǵyndarynyń biri. Bul saýalǵa aýyldardyń birinde erekshe balalarǵa arnalǵan ońaltý ortalyǵyn ashqan áleýmettik kásipker, Májilis depýtattyǵyna kandıdat Dınara Naýmova jaýap berdi.

«Men de serebraldy sal aýrýymen aýyramyn, son­dyqtan sizdiń shaǵymyńyzdy jaqsy túsinemin. Men de jyl saıyn osy komıssııalardan ótip júrmin, taǵy ótemin. Bala kezimde ózime de sol suraqty qoıyp, ájemnen «Aıaq-qolynan aıyrylǵan adamdar múgedekter arbasynda otyryp, jańa aıaǵy óspegenin rastaýy kerek pe?» dep suraıtynmyn. Saılaýaldy baǵdarlamamyzda qoǵamdaǵy ınklıýzıvtilikti damytýǵa úlken kóńil bóldik. Bul eldegi múmkindigi shekteýli jandardyń jaǵdaıyn ózgertkimiz keletinin bildiredi. Onyń ishinde qajetsiz jáne paıdasyz prosedýralardan qutylý da bar», dedi Dınara Naýmova.