«Aq jol» partııasy respýblıkalyq shtabynyń músheleri Berik Dúısembınov, Dmıtrıı Vasılev, Abaı oblysy fılıalynyń tóraǵasy Erjan Tileýjanov jáne Májilis pen jergilikti máslıhat depýtattyǵyna kandıdattar «Qazpolıgraf» JShS men Semeı sement zaýytynyń eńbek ujymdarymen kezdesý ótkizdi.
Partııa tóraǵasynyń orynbasary Berik Dúısembınov partııa saıası baǵdarlamasynyń alty basym baǵytyn atady. Olar – Táýelsizdik pen «Alash» ulttyq ıdeıasy, demokratııa men parlamentarızm, sybaılas jemqorlyq jáne deofshorızasııamen kúres, áleýmettik ádilettilik, naryqtyq ekonomıka jáne kásipkerlikti qoldaý, syrtqy saıasat. Ol sybaılas jemqorlyqpen kúreske qatysty máselege jan-jaqty toqtalyp, «Aq jol» demokratııalyq partııasy qylmystyq-atqarý júıesinde jazasyn ótep jatqan jemqor sheneýnikterdi shartty túrde merziminen buryn bosatýǵa zań júzinde tyıym salý qajet dep sanaıtynyn aıtty.
«Aq jol» depýtattary 2019 jyldan beri bul usynysty birneshe ret engizdi, 2020 jyly mundaı norma Qazaqstan Respýblıkasynyń Qylmystyq kodeksinde, biraq aýyr jáne asa aýyr sybaılas jemqorlyq qylmystarǵa qatysty ǵana qabyldandy. «Muny jetkiliksiz dep esepteımiz jáne barlyq jemqor sheneýnikti shartty túrde merziminen buryn bosatýǵa tyıym salýdy talap etemiz», dedi kandıdat.
Sonymen qatar jıynda ádil saılaý máselesi kóterildi. Aqjoldyqtar muǵalimderdi bógde jumysqa tartýǵa tyıym salý, muǵalimderdiń saılaý komıssııalaryna qatysýyn shekteý, qosymsha qun salyǵynyń saralanǵan mólsherlemelerin engizý, ınflıasııamen kúres, ıpotekalyq nesıeniń joǵary paıyzdyq mólsherlemesi týraly aıtty.
Kandıdattar «Aq jol» demokratııalyq partııasy Úkimet quramyn Memleket basshysy emes, Parlamenttik saılaýda jeńiske jetken partııa jasaqtap, ony Prezıdenttiń bekitýine usynyp, sol úkimettiń jetistikteri men sátsizdikterine jaýapty bolýy kerek dep sanaıtynyn eske saldy.
Jınalǵandar zeınet jasyn tómendetý, áleýmettik baspanaǵa qatysty suraqtar qoıdy. Sondaı-aq Úkimet aldynda aýyl sharýashylyǵyn qoldaý máselesin kóterýdi surady.