«Amanat» partııasynyń respýblıkalyq saılaýaldy shtaby músheleriniń úgit-nasıhat jumysy Pavlodar oblysynda jalǵasty. Shtab músheleri birmandatty saılaý okrýgteri boıynsha kandıdattarmen kezdesýde úgit-nasıhat júrgizýdiń ózekti máselelerin talqylady.
«Biz aldaǵy saılaýda jeńiske jetýge umtylyp jatyrmyz. Saılaýshylardyń senimin aqtaýymyz kerek. Ol úshin azamattardyń usynys-pikirin jınap, «Esikten esikke» aksııasyn uıymdastyramyz. Jumysshylar, muǵalimder, kásipkerler, dárigerler, sharýalar syndy naqty áleýmettik toptarmen jáne ózge de azamattarmen kezdesý ótkizemiz. Bizdiń maqsatymyz – Ádiletti Qazaqstandy qurý», dedi partııanyń atqarýshy hatshysy Elnur Beısenbaev.
Budan keıin Elnur Beısenbaev azamattyq qoǵam ókilderimen jáne jastarmen kezdesti.
«Bizdiń partııa memleket pen qoǵam arasyndaǵy adal ári ashyq dıalogti qoldaıdy. Úkimettik emes uıymdarǵa, kommersııalyq emes qorlarǵa qoldaý kórsete otyryp, biz azamattardy saıası belsendilikke, el basqarý isine aralasýǵa yqpal etemiz», dedi ol.
Al partııa atynan Parlament Májilisiniń depýtattyǵyna kandıdat Janarbek Áshimjanov Qonaev qalasynyń irgesindegi sý elektr stansasyna bardy. Kandıdat Qapshaǵaı sý elektr stansasynyń ujymymen kezdesip, partııanyń saılaýaldy baǵdarlamasyn túsindirdi. Sondaı-aq partııanyń aldaǵy josparyn jetkizip, qyzmetkerlerdiń ótinish-tilegine qulaq túrdi.
«Partııa árdaıym halyq múddesi jolynda qyzmet etip keledi. Otandastarymyzdyń amanatyn arqalaǵan partııa buqaranyń turmys sapasyn arttyryp, áleýmettik jaǵdaıyn jaqsartýdy kózdeıdi. Biz óńirdegi jylý jáne sýmen jabdyqtaý jelileriniń tozý deńgeıin 42,8 paıyzǵa deıin tómendetýge kúsh salamyz», dedi Janarbek Áshimjanov.
Sondaı-aq kandıdat óńirde jumyssyzdyq, qymbatshylyq, ekologııa máselesinde birqatar problema baryn aıtyp, ony sheshý joldaryn talqylady. О́z kezeginde, kásiporyn ujymy kandıdattyń bastamalaryna sáttilik tiledi.