«Respublica» partııasynyń ókilderi Aqtaý qalasyndaǵy kásiporyn ujymdarymen kezdesip, jınalǵandarǵa saılaýaldy baǵdarlamanyń basym baǵyttaryn túsindirip berdi. Sondaı-aq partııa ókilderi jumyskerlerdiń saýalyna jan-jaqty jaýap berýge tyrysty.
Kezdesýlerdiń birinde kadr máselesi sóz boldy. Máselen, «QazAzot» kásiporny qyzmetkerleri hımııa mamandyǵyn bitirýshiler óndiriske az keletinin aıtty. «Hımık bolý úshin UBT-da fızıka men hımııa pánderin tańdaý kerek. Al bul pánderdi túlekterdiń shamamen 1%-y ǵana tańdaıdy. Biz muny ózgertýimiz kerek. Sondyqtan biz kásiptik baǵdar berýge úlken kóńil bólemiz. Jastar qaıda baratynyn, qaı salada suranysqa ıe bolatynyn bilýi úshin jumys berýshilerdiń naqty mamandarǵa suranysy týraly halyqty únemi habardar etip otyrý qajet», dedi partııa apparatynyń jetekshisi, Májilis depýtattyǵyna kandıdat Oljas Quspekov.
Psıhologııa mamandyǵy boıynsha bilimi bar, erekshe balalarmen jumys isteıtin kásiporyn qyzmetkerleriniń biri DSP jáne Daýn sındromyna shaldyqqan balalardyń jıilep ketkeni týraly másele kóterdi. Atap aıtqanda, 2015 jyldan beri oblysta kámeletke tolmaǵandar arasyndaǵy mundaı dert 5 esege ósken. Alaıda olarǵa arnalǵan mektepter men ońaltý ortalyqtary jetkiliksiz.
«Men sertıfıkaty bar klınıkalyq psıhologpyn. Men sizdiń ne týraly aıtyp turǵanyńyzdy túsinemin. Bul jaǵdaıda eki negizgi másele bar: birinshisi aýrýmen týǵan balalardy ne isteý kerek, ekinshisi bolashaqta aýrýshańdyqtyń artýyna jol bermeý úshin ne isteý kerek? Bizdiń partııa ıntegrasııalyq jáne profılaktıkalyq medısınany damytýǵa baǵyttalǵan bastamalardy qolǵa alyp jatyr. Kóp jaǵdaıda otandyq densaýlyq saqtaý salasyna burynnan bar aýrýlardyń saldarymen kúresýge týra keledi. Biz aýrýdyń saldaryn boldyrmaýdy ǵana emes, sonymen qatar aýrýdyń ózin de boldyrmaýdy basty mindet dep sanaımyz», dedi «Respublica» partııasynyń teń tóraǵasy, Májilis depýtattyǵyna kandıdat Qýanysh Shonbaı.
Mańǵystaý oblysy boıynsha saılaýaldy týry aıasynda «Respublica» partııasynyń músheleri qala aqsaqaldarymen kezdesý ótkizip, Adaı ata kesenesine baryp, mádenı is-sharalarǵa qatysty.