Prezıdent Qasym-Jomart Toqaev pen shahmattan áıelder arasynda halyqaralyq grossmeıster Dınara Sádýaqasova elimizde shahmatty damytý jóninde pikir almasty, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysyna Dınara Sádýaqasova elimizde shahmattyń tanymaldylyǵyn arttyrý úshin atqarylyp jatqan jumystar jáne keleshektegi jospary jóninde baıandady.
Onyń aıtýynsha, balalar arasynda sheberlik saǵattary men kvalıfıkasııalyq týrnırler udaıy uıymdastyrylyp turady.
Prezıdent Dınara Sádýaqasovany byltyr jyl sońynda Almatyda ótken álem chempıonatynda shahmattyń rapıd túrinen kúmis medalǵa qol jetkizýimen taǵy da quttyqtap, shahmatshylarǵa memleket tarapynan jan-jaqty qoldaý kórsetiletinin atap ótti.
Sondaı-aq Qasym-Jomart Toqaev belgili shahmatshyǵa aldaǵy jarystarda sáttilik tiledi.