Ulystyń uly kúni merekesine oraı Tarazdaǵy Yqylas Dúkenuly atyndaǵy qalalyq mádenıet úıinde «Umyt bolǵan oıýlar» atty quraqshylar festıvali uıymdastyryldy.
Qolónershilerdiń týyndylary ornalastyrylǵan kórmeni tamashalaǵandardyń qatarynan tabylǵan Taraz qalasynyń ákimi Baqytjan Orynbekov ulttyq tanym men dástúrden qol úzbegen óńirde mundaı is-sharalar jıi ótýi kerektigin aıtty.
– Qazaqtyń oıý-órnek óneri – álimsaqtan beri halqymyzben jasasyp keledi. San ǵasyrlyq tarıhymen bite qaınasqan bul óner túri halyqtyń shynaıy rýhanı tanymymen de astasyp jatyr. Oıý-órnek – qazaq eliniń mádenı damýynyń shejiresi. Onyń kóne ataýy – halyqtyń tarıhy men mádenıetin, ulttyq ereksheligin, dúnıetanymyn sıpattaıdy.
Qazirgi jahandaný dáýirinde bizdiń qazaqy oıý-órnegimizdiń birshama túri umytylyp barady. Bul kóńil qynjyltar jaǵdaı. Sebebi búgingi óskeleń urpaq qazaqtyń osy baǵa jetpes qundylyǵynyń mańyzyn túsinip, sanasyna toqýy qajet.
Búgingi festıvalge qatysýshylar umyt bolǵan ulttyq qundylyǵymyzdy ulyqtap, jas býynnyń sanasyna sáýle uıalatady degen senimdemin.
Jalpy, bul is-shara myńdaǵan jyldar boıy qalyptasqan ulttyq oıý-órnekterimizdi myna almaǵaıyp zamanda aman saqtap, jastarymyzdyń boıynda jańǵyrtýǵa baǵyttalyp otyr. Sondyqtan festıvalge qatysqan barsha analarǵa alǵysymdy bildiremin, – deıdi B.Orynbekov.
Festıval sońynda baıqaý jeńimpazdary men júldegerleri arnaıy marapattarǵa ıe boldy.
Festıval aıasynda «Shapaǵat» medaliniń ıegeri, kásipker Anar Beksultanova men shákirtteriniń týyndylary kópshilik nazaryna usynylyp, sheberlik synyby uıymdastyryldy.
Taraz