S.Seıfýllın atyndaǵy Qazaq agrotehnıkalyq zertteý ýnıversıteti stýdentterden quralǵan mehanıkalandyrylǵan jasaqtardy elimizdiń eki oblysyna kóktemgi egis jumystaryna kómektesýge attandyrdy.
Ústerine arnaıy tigilgen jumys formasyn kıip, egin sebý naýqanyna attanyp bara jatqan jastardy bilim ordasy saltanatty túrde shyǵaryp saldy.
Saltanatty sharada ýnıversıtettiń Basqarma tóraǵasy - Rektor, QR UǴA akademıgi Qanat Maratuly Tireýov arnaıy jasaq quramyna sátti sapar tilep, elimizdiń aýyl sharýashylyǵy salasyna erekshe úles qosatyndyqtaryna senim bildire otyryp jastardy jigerlendirdi.
«Bul «Stýdenttik mehanıkalandyrylǵan jasaqtardy» qaıta jandandyrý jumystaryn bizdiń QazATZÝ arnaıy túrde qolǵa alyp otyr. Eń birinshi mehotrıad quramyndaǵy stýdentter ózderiniń kásibı daıyndyǵyn jetildiredi. Sonymen birge jastar aýyl sharýashylyǵy kásiporyndaryna kóktemgi egis jumystary men kúzgi astyq jınaý, jem-shóp daıyndaý naýqandaryn tabysty júrgizýge kómek kórsetedi. Tarıhtan belgili elimizde «mehotrıad» óz zamanynda elimizdiń barlyq óńirlerinde jasaqtalyp osyndaı úlken naýqandar kezinde zor úles qosty. Bolashaqta biz bul jasaq quramyn únemi molaıtyp otyramyz», dedi ol.
Búginde elimizdegi tehnıkalyq joǵary oqý oryndary aldyna óz stýdentterin jumyspen qamtý máselesi qoıyldy. Osyǵan oraı, elimizdiń agrotehnıka salasyndaǵy beldi oqý orny – Seıfýllın ýnıversıteti umyt qalǵan mehanıkalandyrylǵan jasaqtardyń jumysyn qaıta jandandyryp, túlekterdi ýnıversıtet qabyrǵasynan bastap jumysqa daıyndap otyr.
Seıfýllın ýnıversıtetiniń alǵashqy jasaǵy sáýir aıynan bastap Soltústik Qazaqstan oblysy «Soltústik Qazaqstan aýylsharýashylyq tájirıbe stansııasy» JShS-ǵa jáne Qaraǵandy oblysy, Nura aýdany, «Shahterskoe» JShS-ǵa «Agroınjenerııa» boıynsha óndiristik tájirıbeden ótý maqsatynda jumysqa attanady. Ázirge 50 bilim alýshylardan qurylǵan mehanıkalandyrylǵan jasaq óz jumysyn bastap ta ketti.
«Keńes Odaǵy kezinde erekshe belsendi jumys atqaryp el aýzynda «Mehotrıad» degen atpen tanylǵan stýdentterden quralǵan jasaqtar sol ýaqytta odaqtyń iri jobalaryna qatysyp, jalpy ekonomıkanyń órleýine eleýli úles qosty. Bir mezgilde quramynda 300-400 stýdent bar ondaǵan mehanıkalandyrylǵan jasaqtar qurylyp, odaqtaǵy barlyq memleketterge attanyp otyrǵan. Olar kóbine, elimizdiń astyqty óńirlerine jerlerdi ıgerý kezinde aýylsharýashylyqtyń jandanýynda mańyzdy ról atqardy. Men ózim de osy Seıfýllın ýnıversıtetiniń stýdenti bolyp júrgen shaǵymda talaı ret osy otrıad quramynda boldym», deıdi ýnıversıettiń birinshi Prorektory Aıtjan Ábdirov.
Quramnyń barlyq múshelerine arnaıy tigilgen jumys kıimder úlestiriledi. Barlyq qajetti quraldarmen qamtamasyz etilgen jasaq, ýnıversıtet aldynan jumys oryndaryna avtobýstarmen attandy.
Bir aıta keterlik jaǵdaı, jastar belsendi jumys isteýi úshin jatyn oryn, tamaqtaný, turmysqa qajetti zattardyń barlyǵy jumys berýshi tarapynan tegin uıymdastyrylyp otyr.
Berdibek Habaı