Almaty-Pavlodar poıyzynda er adam ishimdik ishkeni úshin 20 táýlikke ákimshilik qamaýǵa alyndy, dep habarlaıdy Egemen.kz.
Oqıǵa Almaty-Pavlodar baǵytyndaǵy jolaýshylar poıyzynda bolǵan. Quqyq buzǵan jolaýshy Shyǵys Qazaqstan oblysy Aqtoǵaı stansııasyna kelgennen keıin poıyz bastyǵynyń aktisi boıynsha túsirilip, jelilik polısııa bólimshesiniń qyzmetkerlerine berildi.
Bul týraly kóliktegi polısııa departamenti bastyǵynyń birinshi orynbasary Madııar Aıtýǵanov aıtty. Tekserý barysynda kólik polıseıleri Pavlodar oblysynyń 28 jastaǵy turǵynyn anyqtady. Alkogoldi ishimdikke masaıǵan jolaýshy balaǵat sóz aıtyp, jolserikterdiń eskertýlerine qulaq aspaǵan. Osylaısha qoǵamdyq tártipti buzǵan.
«Tártip saqshylary quqyq buzýshyǵa qatysty QR ÁQBtK-niń 440-baby 3-bóligi, 434-baby 1-bóligi boıynsha eki hattama toltyryp, is Pavlodar oblysy Baıanaýyl aýdandyq sotyna jiberildi. Aıta ketý kerek, er adam buǵan deıin de qoǵamdyq oryndarda alkogol ishkeni úshin jaýapqa tartylǵan. Endi óreskel áreketin qaıta jasap otyr. Sot ákimshilik istiń materıaldaryn qarap, ony 20 táýlikke ákimshilik qamaýǵa alý túrinde ákimshilik jaza taǵaıyndaý týraly qaýly shyǵardy», dedi M.Aıtýǵanov.