ASTANA. 5 shilde. Búgin túnde Rıo-de-Janeıro qalasynda Fransııa men Germanııa quramalary arasynda shırek fınaldyń birinshi matchy oınalyp, onyń qorytyndysy jartylaı fınalǵa shyqqan alǵashqy komandanyń atyn atady. Mundaı qurmetke qarsylastaryn 1:0 etip utqan nemister ıe boldy. Bul týraly egemen.kz habarlady.
Kezdesý eki jaq úshin de óte aýyr ótti. Ondaǵy jyldamdyq ta burynǵydaı asyp-tógilgen joq. Degenmen, «nemis máshınesiniń» matchty senimdi bastaýy máseleni ońaı sheship ketti.
Fransııa – Germanııa 0:1 (0:1).
4 shilde. Rıo-de-Janeıro. «Marakana» stadıony. 74 240 kórermen. Tóreshi – Nestor Pıtana (Argentına).
Fransııa: Ýgo Lorıs, Mate Debıýshı, Rafael Varan, Mamadý Sako (Loran Koselnı, 72), Patrıs Evra, Pol Pogba, Ioan Kabaı (Loık Remı, 73), Blez Matıýıdı, Mate Valbýena (Olıve Jırý, 85), Karım Benzema, Antýan Grızmann.
Germanııa: Manýel Noıer, Fılıpp Lam, Jerom Boateng, Mats Hýmmels, Benedıkt Hıovedes, Bastıan Shvaınshtaıger, Samı Hedıra, Tonı Kroos (Krıstof Kramer, 90+2), Tomas Mıýller, Mıroslav Kloze (Andre Shıýrrle, 69), Mesýt Ozıl (Marıo Gıotse, 83).
Gol: Mats Hýmmels (13).
Eskertýler: Samı Hedıra (54), Bastıan Shvaınshtaıger (80).
Eki jaq ta oıyndy asyqpaı bastady. Biraq kóp uzamaı nemister tizgindi qolǵa alýǵa umtyldy. Buǵan fransýzdar qorǵanystaǵy muqııat oıynmen jaýap berdi. Birinshi soqqyny Samı Hedıra jasady. Ony qorǵaýshylar tez zalalsyz etip úlgerdi. Sosyn nemister qos qaptaldan atoı saldy. Fransııa quramasynyń qorǵaýshylary bulardy da qaıtara bildi. Al nemis fýtbolshylary kóbine jeke-dara oınaýǵa, drıblıngke salmaq sala bastady. Bul fransýzdardy birine biriniń járdemge kelýge májbúr etti. Osy sátte olardyń jasaǵan birinshi qarsy shabýyldary qaýipti boldy. Mate Valbýena quıyndaı quıǵytyp, aıyp alańyna kirdi de qaptaldaǵy Karım Benzemaǵa pas berdi. О́z kezeginde forvard qaqpaǵa qaıqaıta soqty. Dop baǵannyń dál janynan zý ete tústi.
Fransýzdar budan keıin de saqtyqpen oınady. Alaıda, osy tusta olar aqyry óz qaqpalaryna dop jiberip aldy. Standartty jaǵdaıdan aıyp dobyn urǵan Tonı Kroos ony aıyp alańyna jóneltti. Sol jerde Mats Hýmmels qorǵaýshy Rafael Varanty aldap ótip, qaqpaǵa qatty soqty. Dop torǵa baryp búlk etti. Gol!
Nemister osydan keıin esepti ulǵaıtýǵa kúsh salyp, qarqyndy biraz kúsheıtti. Al fransýzdar buǵan onshalyqty daıyn bolmaı shyqty. Olar birazǵa deıin ózderine kele almady. Sodan keıin ǵana oıyndaǵy tarazy basyn ózderine qaraı aýdarmaqshy bolyp edi, oǵan úziliske deıin shamalary jetpedi.
Ekinshi taımdy Elıseı alańdarynan kelgen jigitter birshama qarqyndy bastady. Osy shabýyldyń ótinde birshama qaýipti sátter de týǵyzdy. Biraq nemister de olardan qalysa qoıǵan joq. Eki jaqtyń múmkindikterdi durys paılalana almaǵan qalpynda match ta aıaqtaldy. Ol «nemis máshınesiniń» jartylaı fınalǵa shyqqanyn kórsetti. Ol endi osynyń sońyn ala Kolýmbııany 2:1 etip utqan Brazılııa quramasymen oınaıdy.
Damır Qojamqul.
Derekkóz: egemen.kz.
Foto: Sportbox.ru.