Jańa baǵdarlamanyń tanystyrylymy

Eldegi qoǵamdastyq «Nur Otan» partııasynyń sybaılas jemqorlyqqa qarsy jańa baǵdarlamasynyń jobasyn talqylaýǵa tartylady Partııanyń Ortalyq apparatyndaǵy Jumys tobynyń otyrysynda «Nur Otan» partııasynyń 2015-2025 jyldarǵa arnalǵan sybaılas jemqorlyqqa qarsy is-qımyl baǵdarlamasynyń jobasy tanystyryldy. 2015-2025 jyldarǵa arnalǵan sybaılas jemqorlyqqa qarsy is-qımyl baǵdarlamasynyń jańa jobasy qoǵamdastyq, ınternet-paıdalanýshylar, sarapshylar, úkimettik emes uıymdar men partııa músheleriniń talqylaýy men usynystar engizýi úshin nurotan.kz resmı saıtynda jarııalanady. Usynystar men tolyqtyrýlardy anticorruption@nurotan.kz elektrondyq poshtasyna jiberýge bolady. Otyrysty ashqan partııa Tóraǵasynyń birinshi orynbasary Baýyrjan Baıbek: «Bes aılyq jumystan keıin bizdiń qolymyzda baǵdarlama jobasy bar, biz ony Memleket basshysynyń tapsyrmasymen qalyń buqaranyń talqylaýyna usynyp jatyrmyz. Qalaǵan adam óziniń pikiri men usynysyn joldaı alatyn arnaıy poshtalyq mekenjaı quryldy, bul partııanyń strategııalyq jáne mańyzdy qujatynyń qalyń qaýymnyń talqylaýynyń kómegimen jasalǵan alǵashqy oqıǵa emes. Bizdiń saıası Doktrınamyz da dál osylaı jazylǵan bolatyn. Biz sybaılas jemqorlyqqa qarsy is-qımyl baǵdarlamasyna oraı kelgen árbir hatqa, kez kelgen usynysqa rıza bolamyz», dedi. Sybaılas jemqorlyqtyń kórinisimen emes, ony týǵyzatyn sebeptermen jáne jaǵdaımen kúres baǵdarlamanyń eń negizgi qaǵıdattarynyń biri bolyp tabylady. Álemdik ozyq tájirıbeniń negizinde otandyq zańnamany jetildirý usynylady. Jańa baǵdarlamada qoǵamda sybaılas jemqorlyq pen onyń kórinisine tózbeıtin mádenıet qalyptastyrýǵa, sondaı-aq, memleket, azamat jáne bıznestiń teń jáne jaýapty áriptes retindegi qarym-qatynasynyń sapaly jańa sıpatyn qalyptastyrý qajet­tiligi týǵandyqtan, elimiz­diń barlyq aımaǵyndaǵy túrli maqsatty toptarmen jáne azamat­tyq sektorlarmen qarym-qatynas ornatýǵa basymdylyq beriledi. Baǵdarlamada alǵash ret sybaılas jemqorlyqqa qarsy is-qı­myl úshin qoǵamnyń jáne ár azamattyń jaýapkershiligi beki­tiledi. Otyrys barysynda B.Baıbek atalǵan baǵdarlamanyń aza­mat­tardyń sybaılas jemqorlyqqa degen sanasy men kózqarasyn ózgertýge sebepker bolatynyn túsindirdi. Baǵdarlamany iske asyrý mem­lekettiń azamattardyń múd­desine tıimdi qyzmet etýi men jaýapty azamattyq qoǵam­nyń qurylýyna, sondaı-aq, kúshti qazaqstandyq bız­nestiń damýyna jaǵdaı týǵy­zady. Par­tııanyń saıası Doktrı­nasynda kórsetilgendeı, osy ele­ment­terdiń ózara jaýap­ker­shi­ligi men shynaıy áriptestigi Qazaq­stannyń bolashaqtaǵy ty­bys­tylyǵyn anyqtaıtyn bolady. Qujatty qatarynda belgili zańgerler, sarapshylar, qoǵam qaıratkerleri, Bas prokýratýra men Sybaılas jemqorlyqqa qar­sy kúres agenttiginiń ókilderi bar Jumys tobynyń daıyndaǵanyn eske salǵymyz keledi. Sarap­shy­lar tobynyń jumysyna Par­lament Májilisindegi partııa fraksııasynyń múshesi Nurlan Ábdirov jetekshilik etti. Baǵdarlamany júzege asy­rý­dyń is júzindegi mehanızmi retinde ár besjyldyqqa sybaı­las jemqorlyqqa qarsy is-qımyldyń Jol kartasy men jyl saıynǵy sharalardyń jospary ázirlenetin bolady. Jalpyálemdik úrdister esepke alyna otyryp, Sybaılas jem­qorlyqqa qarsy partııalyq baǵ­darlamanyń nátıjesi Memleket basshysyna tanystyrylatyn jáne BAQ-tarda jarııalanatyn bolady. Bul qujattardan sybaılas jemqorlyqqa qarsy saladaǵy kúrestiń tolyq sıpaty kórinip, onda sybaılas jemqorlyq quqyq buzýshylyqtyń sany jáne onyń deńgeıiniń baǵalanýy týraly aqparat qamtylatyn bolady.   «Egemen-aqparat».