«21 sáýirden bastap Mánshúk Mámetova atyndaǵy Oral halyqaralyq áýejaıynan Mysyrǵa ushý bastaldy. Reıster jaz boıy júredi» dep habarlaıdy áýejaıdyń baspasóz qyzmeti basshysy Aınagúl Saqposynova.
Sharm-ásh-Sheıh pen Oral shaharynyń arasyn Scat Airlines áýekompanııasy jalǵaıdy. Endi álemge tanymal kýrortqa Boeing 737MAX ushaǵymen Oral qalasynan bes kúnde bir ret ushýǵa bolady. Reıster qazan aıyna deıin josparlanǵan.
«Oral qalasynan shyǵatyn áýe reısterin kóbeıtý – biz kózdegen basym baǵyttyń biri», deıdi áýejaıdyń bas dırektory Rýstam Bektemirov. «Biz óńir turǵyndaryna el ishinde suranysqa ıe baǵyttar boıynsha, sondaı-aq tanymal sheteldik kýrorttar boıynsha tikeleı reısterdiń qoljetimdi bolýyn kózdep otyrmyz. Mysyrǵa charterlik baǵdarlamanyń bastalýy bul máseleni sheshýdegi mańyzdy oqıǵa boldy».
Aıta keteıik, buǵan deıin Oral áýejaıy arqyly Astana-Oral-Maındaǵy Frankfýrt áýe reısteri 2017 jyldyń 14 maýsymynan beri aptasyna eki márte ushyp keledi. Al byltyr jazda Túrkııanyń Antalııa qalasyna maýsymdyq reıster qosylǵan bolatyn. Ol bıyl mamyr aıynda qaıta jalǵasady. Scat Airlines túrik kýrortyna aptasyna eki ret ushatyn charterlik baǵdarlamany bastaıdy.
«Oral qalasynan ushatyn týrlardy qazirdiń ózinde týroperatorlardan satyp alýǵa bolady», deıdi Aınagúl Saqposynova.
Batys Qazaqstan oblysy