Senat tóraǵasy Máýlen Áshimbaev Almaty oblysy máslıhatynyń depýtattarymen kezdesip, Memleket basshysynyń tapsyrmalarynan týyndaǵan mindetterdi talqylady.
Kezdesýde Senattyń máslıhattarmen ózara is-qımylynyń jańa formaty jóninde de sóz qozǵaldy. О́z sózinde Palata spıkeri Qazaqstannyń áleýmettik-ekonomıkalyq damý máseleleri jónindegi keńeste el Prezıdenti júktegen mindetterdi sapaly ári jedel iske asyrý qajet ekenin aıtty. Sondaı-aq Máýlen Áshimbaev Senat óńirlerdiń múddesin qorǵaıtyn Palata ekenin atap ótip, aldaǵy ýaqytta da máslıhattarmen baılanys kúsheıe túsetinin jetkizdi.
«Ár óńirde ózine tán ózekti máseleler bar. Olardyń basym kópshiligi, Prezıdentimiz atap kórsetkendeı, ınfraqurylymǵa, áleýmettik nysandarǵa, memlekettik baǵdarlamalardyń iske asyrylýyna qatysty. Senat depýtattary osy máselelerdi ortalyq deńgeıde júıeli túrde kóterip, olardyń oń sheshilýine yqpal etedi. Byltyr Parlament 86 zań qabyldady. Olardyń 13-ine depýtattardyń ózderi bastamashy boldy. Qabyldanǵan zańdardyń bári eldiń damýyna jáne halyqtyń ómir súrý sapasyn arttyrýǵa baǵyttalǵan. Búginde Prezıdentimiz bekitken on ulttyq joba iske asyrylýda. Onyń bári – óńirlerge tikeleı qatysy bar qujattar», degen Máýlen Áshimbaev jıynǵa qatysýshylardy Memleket basshysy júktegen mindetterdi iske asyrý jolynda judyryqtaı jumylýǵa shaqyrdy.
Senat spıkeri búginde elimizde jergilikti memlekettik basqarý jáne ózin ózi basqarý júıesin damytý baǵytynda aýqymdy jumys atqarylyp jatqanyn, sonyń barysynda máslıhattardyń rólin arttyrý da mańyzdy qadam ekenin aıtty. Máýlen Áshimbaev qazirdiń ózinde qoldanystaǵy zańnamalarǵa birqatar memlekettik fýnksııany ortalyqtan óńirlerge beretin tıisti túzetýler engizilgenine nazar aýdardy. Aldaǵy aılarda osy baǵytta taǵy biraz jańa normalar qabyldanady.
«Búginde Prezıdentimiz basqarý júıesin ortalyqsyzdandyrý máselesine úlken mán berip otyr. Osy maqsatty júzege asyrý úshin jýyrda ákimshilik reformalar boıynsha birqatar zańǵa ózgerister men tolyqtyrýlar engizildi. Nátıjesinde, Úkimettiń biraz fýnksııasy ortalyq memlekettik organdarǵa berildi. Ákimshilik reformanyń kelesi kezeńinde birqatar quzyret jergilikti bılik organdaryna berilýge tıis. Osyǵan qatysty tıisti zańdardy aldaǵy aılarda qabyldaýdy josparlap otyrmyz. Jalpy, ákimshilik ózgeristerdiń jańa kezeńi jergilikti ókildi organdardyń quzyretin keńeıtýge jol ashady dep senemiz», dedi Máýlen Áshimbaev.
Senat tóraǵasy M.Áshimbaevtyń máslıhat depýtattarymen kezdesýinde Almaty oblysynyń ákimi Marat Sultanǵazıev óńirdiń áleýmettik-ekonomıkalyq baǵyt-baǵdary jóninde baıandady.
«Ákimshilik ortalyqtyń aýdandarǵa jaqyndaı túsýi – oblystyń aýmaqtaryn teńgerimdi damytýǵa mol múmkindik berip otyr. Maıatnıktik kóshi-qondy tómendetip, úlken ekonomıkalyq ósim beretin iri jobalar bastaý aldy. Eń aldymen, Almaty jáne Qonaev qalalarynyń arasynda «G4 City» arnaıy ekonomıkalyq aımaǵy quryldy. Biregeı joba keleshekte 3,7 trln teńge ınvestısııa tartýdy kózdeıdi. Ekinshiden, Almaty qalasynyń mańynda jalpy alańy 1,5 myń gektar bolatyn 4 ındýstrııalyq aımaq qurýdamyz. Ol jerde túrli salalardaǵy perspektıvalyq jobalardy ornalastyrý qarastyrylǵan. Úshinshiden, megapolıstiń aınala ornalasqan 183 myń adam turatyn 674 saıajaılar máselesin kezeń-kezeńmen sheshý bastaldy. Atap aıtqanda, eldi mekenderdiń bas josparlaryna túzetý engizilip, olardyń quramyna 270 saıajaı massıvi qosylady. Tórtinshiden, oblys ortalyǵy – Qonaev qalasyn damýdyń jańa núktesine aınaldyrý maqsatynda tıisti jumystar atqarylyp keledi», degen oblys ákimi Qonaev qalasynan Ǵylym men bilim mınıstrligimen birlesip, Akademııalyq qalashyq qurýdyń jol kartasy qabyldanǵandyǵyn, aldaǵy mamyr aıynda qalanyń Bas jospary bekitiletinin málimdedi.
Sonymen qatar sapar barysynda Senat tóraǵasy Almaty oblysynyń belsendi jastarymen kezdesti. Ol jas saıasatkerlerdiń jańa býyny Prezıdentimiz belgilep bergen Ádiletti Qazaqstan qurý baǵdaryn ári qaraı jalǵastyratynyna senim bildirdi.
«О́zderińizge belgili, 2019 jáne 2020 jyldary Jastar jáne Volonterler jyly bolyp jarııalandy. Bilikti jastardy eldik isterge tartý úshin Prezıdenttik jastar kadrlyq rezervi quryldy. Memleket qashanda sizderdiń oı-pikirlerińiz ben usynystaryńyzdy tyńdaýǵa daıyn. Senat janyndaǵy Jas sarapshylar klýby men Taldaý mektebiniń de negizgi maqsattarynyń biri osy. Sizderdi atalǵan jobalarǵa belsendi qatysýǵa shaqyramyz», degen Palata spıkeri ár adam óz boıynda durys qundylyqtardy qalyptastyrý úshin tereń bilim men kásibı qabilet qajet ekenin aıtty.
Senat tóraǵasy sapar qorytyndysynda «Sharapat» arnaýly áleýmettik qyzmet kórsetý ortalyǵynyń ujymymen kezdesti.
Almaty oblysy