Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary Jetisý oblysynda jumys saparymen boldy, dep habarlaıdy Egemen.kz Senattyń baspasóz qyzmetine silteme jasap.
Depýtattar sapar barysynda jergilikti atqarýshy organdardyń basshylarymen, aýyl sharýashylyǵy ókilderimen kezdesti. Aýyldyq aýmaqtar men aýyl sharýashylyǵyn damytý máselelerimen tanysý maqsatynda Eskeldi, Kerbulaq jáne Panfılov aýdandaryndaǵy aýyldyq eldi mekenderde boldy.
Depýtattar «Aýyl - el besigi» jáne «Aýyl amanaty» jobalarynyń iske asyrý barysymen tanysty, sondaı-aq «Aýyldyq aýmaqtardy damytýdyń 2023-2027 jyldarǵa arnalǵan tujyrymdamasyn» odan ári iske asyrý máselesi boıynsha sharýa qojalyqtarynyń ókilderimen pikir almasty.
«Sizder aýyl sharýashylyǵynyń bizdiń elimizdiń ekonomıkasy men halqymyzdyń áleýmettik jaǵdaıy úshin mańyzy zor ekenin jaqsy bilesizder. Sebebi aýyl sharýashylyǵy bizdiń elimiz úshin ekonomıkanyń negizgi basym baǵyty, sondaı-aq azyq-túlik qaýipsizdiginiń basty kepili bolyp tabylady jáne áleýmettik turǵydan erekshe mańyzǵa ıe. Aýyl – qazaq halqynyń júregi. Sondyqtan aýyldyq aýmaqtardy damytý – bizdiń memleketimizdiń alǵa qoıǵan mańyzdy máselelerdiń biri. Búgingi kezdesýlerdiń basty maqsaty – osy salalardaǵy ózekti máselelerdi ashyq talqylaý jáne sheshý joldaryn qarastyrý», dedi senator Álı Bektaev.
Jetisý oblysynyń turǵyndary men agrarlyq bıznes ókilderi óz kezeginde senatorlarǵa egis daqyldary men mal sharýashylyǵyn sýbsıdııalaýǵa, sondaı-aq aýyl turǵyndarynyń tabysyn arttyrýǵa qatysty birqatar másele týraly aıtyp berdi.
Depýtattar kezdesýler qorytyndysy boıynsha óńirdegi ózekti máseleler týraly Úkimetke tıisti usynystar engizetinin jáne qoıylǵan mindetterdiń oryndalý barysyn baqylaýda ustaıtynyn atap ótti.