Qazaq ádebıetiniń klassıgi, jazýshy-dramatýrg Ǵabıt Músirepovtiń shyǵarmalarynda áıel-ana, arýlar ómiri jan-jaqty sýrettelgen. Bul shyǵarmalarynyń ıdeıalyq, tárbıelik máni de asa joǵary. Olardy oqyǵan oqyrmannyń áıel-ananyń ulylyǵyna degen mahabbaty, syıy, qurmeti arta túsedi.
Jazýshynyń Almatydaǵy mýzeı-úıiniń jumys kabınetindegi kitap sóresinde kelýshilerdiń nazaryn erekshe aýdaratyn bir jádiger «Qara Madonna» foto-kartınasynyń kóshirmesi tur. Uzyndyǵy 47 sm, eni 34/3. Foto-kóshirmeniń tarıhy da qyzyq. Bul foto-kartına – cheh foto-tilshisi Karel Gaektiń «Qara Madonna» atty týyndysy. Chıkagoda ótken foto-sýret kórmesinde altyn medal ıelengen. Ǵ.Músirepov 1963 jyly Aljırge barǵan saparynda osyny qatty unatyp, alyp kelip, óziniń jumys kabınetindegi kitap sóresiniń eń bıik tusyna qoıǵan. Foto-kartınada balasyn qushaǵyna qysyp, emirenip turǵan qara násildi ananyń júzinen sábıine degen ǵajap meıirimdi, súıispenshilikti kóremiz. Sýretker úshin ana beınesi násilge, ultqa bólinbeıdi. Ana árqashanda ana bolyp qalady. Ǵabeń de osy kartınaǵa qarap otyryp erekshe shabyt alǵan shyǵar. О́ıtkeni jazýshynyń Baıan sulý («Qozy kórpesh – Baıan sulý»), Jibek («Qyz Jibek»), Aqtoqty («Aqan seri – Aqtoqty»), Baný («Amangeldi»), Torǵyn («Bolashaqqa amanat»), Aqbota («Qazaq soldaty»), Nazykesh, Kúnzıla, Elızaveta, Kópeı, Kúńshe, Jubaı («Oıanǵan ólke»), Aqlıma («Kezdespeı ketken bir beıne»), «Er ana», «Aqlıma» «Ananyń anasy», «Ashynǵan ana», «Ananyń arashasy», «Ulpan», «Maıra» atty shyǵarmalary – búkilálemdik analar galereıasyna qosylǵan úles.
Ǵabıt Músirepov: «Ana sulýlyǵy júzindegi meıiriminen kórinedi», degen. Ananyń meıirimdiliginde shek joq. Ananyń júzi nur shashyp, jan-jaǵyna óz shýaǵyn tógedi.
Anar KО́ShERBAEVA,
Almatydaǵy S.Muqanov pen
Ǵ.Músirepov ádebı-memorıaldyq mýzeı-kesheniniń kishi ǵylymı qyzmetkeri